‘एक्साईड’ कामगारांच्या आंदोलनाला संघटनांचा पाठिंबा

चिंचवड, ता.३१ : अन्यायकारक बदल्यांच्या निषेधार्थ मागील सुमारे सहा महिन्यांपासून
मोहननगर येथील एक्साईड इंडस्ट्रीज लि. येथे कामगारांचे आंदोलन सुरू आहे. त्याला ईपीएस - ९५ राष्ट्रीय संघर्ष समिती, धर्मराज्य कामगार - कर्मचारी महासंघ आणि राष्ट्रीय मूलनिवासी बहुजन कर्मचारी संघ (बामसेफ) या तीनही प्रमुख संघटनांनी स्वतंत्र पत्रांद्वारे पाठिंबा जाहीर केला.
यावेळी आंदोलक सुनील परसे, आत्माराम धुमाळ, शैलेश कुटे, रवींद्र दोडे, भाऊसाहेब कदम, संतोष भोसले, रेवण भाकरे, सुभाष गावडे, बाळासाहेब अनभुले, संजय कंडारकर आणि कामगारांनी आपल्या अडचणी राष्ट्रीय समिती समोर मांडल्या. ईपीएस - ९५ राष्ट्रीय संघर्ष समितीचे अध्यक्ष कमांडर अशोक राऊत, पश्चिम भारत संघटक सुभाष पोखरकर, पिंपरी चिंचवड अध्यक्ष तानाजी काळभोर, सुधीर ढगे, अलका मोरे, रुपाली ढगे, सरस्वती साबळे आदींनी आंदोलक कामगारांशी थेट संवाद साधला. कामगारांना न्याय मिळवून देण्यासाठी कंपनीच्या स्थानिक व मुख्य व्यवस्थापनाशी पत्रव्यवहार करून आवश्यक त्या उपाययोजना केल्या जातील, असे आश्वासन त्यांनी दिले. धर्मराज्य कामगार-कर्मचारी महासंघाचे अध्यक्ष राजन राजे आणि राष्ट्रीय मूलनिवासी बहुजन कर्मचारी (बामसेफ) संघानेही कर्मचाऱ्यांची गळचेपी थांबवून त्यांना न्याय मिळावा, अशी भूमिका घेतली आहे.