विद्यार्थिनींना पोलिसांकडून ‘खलनिग्रहणाय’चे अभिवचन

चिंचवड, ता. ९ : रक्षाबंधनाच्या निमित्ताने चिंचवड येथील सौ.ताराबाई शंकरलाल मुथा कन्या कनिष्ठ महाविद्यालयाच्या इयत्ता बारावीच्या विद्यार्थिनींनी (ता.८) चिंचवड पोलिस ठाण्याला भेट देऊन पोलिस बांधवांच्या मनगटावर राखी बांधली. पोलिसांनीही ‘सद्रक्षणाय खलनिग्रहणाय’ या ब्रीदवाक्याला अनुसरून आम्ही तुमच्या रक्षणासाठी सदैव सोबत असल्याचा विश्वास त्यांना दिला.
श्री जैन विद्या प्रसारक मंडळाचे मानद सरचिटणीस राजेंद्रकुमार मुथा व सहाय्यक सचिव अनिलकुमार कांकरिया यांच्या मार्गदर्शनाखाली वरील कार्यक्रम आयोजित करण्यात आला. या कार्यक्रमास वरिष्ठ पोलिस निरीक्षक अंकुश बांगर, पोलिस निरीक्षक दीपक गोसावी (गुन्हे), शाळेच्या विभाग प्रमुख सुचिता पाटील, सांस्कृतिक विभाग प्रमुख विजया बोठे, चिंचवड पोलिस ठाण्याच्या शांतता समितीचे सदस्य सुभाष मालुसरे व धनंजय कुलकर्णी उपस्थित होते.
प्राचार्या सारंगा भारती यांनी मुलींच्या सुरक्षेसाठी पोलिस विभागाची मदत आणि तत्परता अधोरेखित केली. तसेच रक्षाबंधन हा केवळ रक्ताच्या नात्यापुरते मर्यादित नसून समाजातील इतर घटकांशी सुद्धा साजरा करून सामाजिक ऐक्य वृद्धिंगत करता येते असे नमूद केले.
कार्यक्रमानंतर पोलिस बांधवांनी सर्व विद्यार्थिनींना खाऊचे वाटप केले. श्री जैन विद्या प्रसारक मंडळाचे व्यवस्थापक सतीश भारती यांनी आभार मानले.

मुलींच्याबाबतीत पोक्सोसारखे बरेच गुन्हे घडत असतात. त्यामुळे त्याबद्दल मुलींमध्ये जागरूकता व्हावी, यादृष्टीने त्यांना माहिती दिली. मोबाईलचा अतिवापर टाळणे, रस्त्यावर मुले किंवा इतर काहीही समाजकंटक त्रास किंवा छेड काढत असेल; तर त्याबद्दल त्यांनी जागरूक होऊन शिक्षकांना सांगून किंवाआमच्याशी बिनधास्त संपर्क करावा.
- दीपक गोसावी, पोलिस निरीक्षक (गुन्हे), चिंचवड पोलिस ठाणे

सामाजिक बांधिलकीची जाण निर्माण व्हावी म्हणून चिंचवड पोलिस ठाण्यातील पोलिस बांधवांना आमच्या विद्यार्थिनी दरवर्षी राखी बांधत असतात. पोलिसांचे पहिले प्राधान्य कर्तव्याला असते. ते कुटुंबापासून लांब असल्यामुळे त्यांना रक्षाबंधनाच्या सणात सहभागी होता येत नाही, म्हणून त्यांना तो आनंद देण्याचा प्रयत्न असतो.
- सारंगा भारती, प्राचार्या, सौ. ताराबाई शंकरलाल मुथा कन्या प्रशाला व कनिष्ठ महाविद्यालय, चिंचवड
CWD25A01750