धोकादायक चेंबरची तात्काळ दुरुस्ती

चिंचवड, ता. १३ ः तानाजीनगर येथील श्री गजानन महाराज सत्संग मंदिरासमोरील मुख्य रस्त्यावर सांडपाण्याचे चेंबर खचले होते. त्यामुळे त्याच्या सभोवती मोठा खड्डा झाल्याने अपघाताचा धोका वाढला होता.
या मार्गावरून दररोज ज्येष्ठ नागरिक, महिला आणि दुचाकीस्वार ये-जा करतात, मंदिर परिसरातही सतत गर्दी असते. रस्त्यावर अचानक खोलगट भाग असल्याने दुचाकीस्वारांचे संतुलन बिघडून अपघात होत होते, तर पादचाऱ्याचा पायदेखील घसरून पडण्याचा धोका वाढला होता. मंदिराचे ट्रस्टी तसेच परिसरातील नागरिकांनी महापालिका विभागाला तातडीने दखल घेण्याची मागणी केली होती.
‘खचलेल्या चेंबरमुळे अपघाताचा धोका’ या वृत्ताच्या माध्यमातून ‘सकाळ’ ने याची दखल घेतली होती. त्यानंतर ‘ब’क्षेत्रीय कार्यालयाच्या स्थापत्य कनिष्ठ अभियंता प्रार्थना सोनवणे यांनी तत्काळ चेंबरची दुरुस्त केली. त्यामुळे परिसरातील नागरिक तसेच मंदिरातील ट्रस्टी यांनी तातडीने काम केल्याबद्दल त्यांचे आभार व्यक्त केले.