भोईर उड्डाणपुलासमोरील जलवाहिनीमधून पाणी गळती

चिंचवड, ता. १८ ः दळवीनगर परिसरात सोपानराव भोईर उड्डाणपुलासमोरील मुख्य रस्त्यावर पाण्याच्या वाहिनीमधून वारंवार गळती होत आहे. त्यामुळे दरवेळी हजारो लिटर पाणी वाया जात आहे. व्हॉल्व तुटणे अथवा वाहिनी फुटल्याने मोठ्या प्रमाणात पाणी रस्त्यावर वाहते. परिणामी वाहतुकीत अडथळा निर्माण होतो. जर वेळेत उपाय केले नाही, तर भविष्यात परिसराला गंभीर पाणीटंचाईचा सामना करावा लागेल, अशी भीती स्थानिकांनी व्यक्त केली आहे.
गेल्या वर्षभरात सहा ते सात वेळा वाहिनी दुरुस्तीचे काम करण्यात आले. मात्र रस्त्याच्या मध्यभागी असलेल्या पाण्याच्या वाहिनीवरून अवजड वाहने गेल्यानंतर काही दिवसांतच पुन्हा त्याच ठिकाणी पाण्याची वाहिनी तुटत आहे. संबंधित प्रशासनाने वाहिनी बाजूला हलवून कायमस्वरूपी उपाययोजना करावी, अशी मागणी स्थानिक नागरिकांनी केली आहे.
CWD25A01828