चिंचवडमधील गोशाळेत वसुबारस उत्साहात

चिंचवड, ता.१८ ः दिवाळीचा पहिला दिवस गोवत्स पूजन अर्थात वसुबारस. त्यानिमित्त चिंचवड येथील केंद्राई गोशाळेत अनेक नागरिकांनी गोमातेचे पूजन केले. तसेच यंदाही गोसेवेतील गो रक्षक, देशी गोवंश सांभाळणाऱ्या गोपाळ आणि कार्यकर्त्यांचा सन्मान सोहळा यावेळी झाला.
राष्ट्रीय स्वयंसेवक संघाचे पश्चिम महाराष्ट्र प्रांत कार्यकारिणी सदस्य हेमंत हरहरे, पुणे विभाग कार्यवाह मुकुंद कुलकर्णी, जेजुरी देवस्थान ट्रस्टचे अध्यक्ष अनिल सौंदाडे, विश्व हिंदू परिषदेचे प्रांत सहमंत्री नितीन वाटकर यांच्या हस्ते सुवर्णभूमी गोशाळेचे प्रमुख अरुण डोंबे, बजरंग दलाचे गोरक्षक महेश गायकवाड आणि आकाश पारडे यांना ‘शिवछत्रपती गोसंवर्धन पुरस्कार’ प्रदान करण्यात आला. केंद्राई गोशाळेचे संस्थापक अध्यक्ष धनंजय गावडे यांनी संयोजन केले.
सांस्कृतिक कार्यक्रमांच्या स्वरूपात मंगलमूर्ती मोरया ग्रुपतर्फे शंभर महिलांनी विष्णू सहस्रनाम पठण केले; तर इस्कॉन रावेत मंदिराच्या भक्तांनी सुंदर सत्संग आणि भक्तिगीतांचा कार्यक्रम सादर केला.
CWD25A02286