नामदेवरायांनी भक्तीमार्गाने देश जोडला ः डॉ.घोणसे

चिंचवड, ता.५ ः ‘‘संत नामदेवरायांनी पंढरी ते पंजाब पायी प्रवास करून विठ्ठल भक्तीने देश जोडण्याचे अलौकिक कार्य केले. त्याचाच परिपाक म्हणून आपले राष्ट्र अखंड आहे,’’ असे प्रतिपादन संत साहित्याच्या अभ्यासक आणि सावित्रीबाई फुले पुणे विद्यापीठाच्या संत नामदेव अध्यासनप्रमुख डॉ.श्यामा घोणसे यांनी केले.
संत नामदेव महाराज आणि गुरु नानकदेव यांच्या जयंतीनिमित्त नानक-साई सेवा ट्रस्ट यांच्यावतीने आकुर्डी गुरुद्वारा येथे तीन दिवसीय गुरुबाणी व्याख्यानमालेचे आयोजन करण्यात आले. तिच्या समारोपादिवशी ‘पंढरी ते पंजाब : संत नामदेवरायांचा भक्तिमार्ग’ या विषयावर डॉ. घोणसे या बोलत होत्या. प्राजक्ता रूद्रावार, गुरबक्षसिंग मेहता, हरदीपकौर मेहता, रामचंद्र बांगर, संदीप दरवेशी, सचिन राजिमवाले आदी यावेळी उपस्थित होते.
डॉ.घोणसे म्हणाल्या, ‘‘नामदेवांनी केलेला उपदेश पवित्र गुरूग्रंथसाहिबमध्ये समाविष्ट आहे. हा उपदेश जगण्याचे तत्त्वज्ञान सांगतो. जुलमी परकीय राजवटींपासून धर्माचे रक्षण करून हे राष्ट्र एकसंघ ठेवण्यासाठी नामदेवरायांनी अखंड भारतभ्रमण करून राष्ट्रसंघटकाची भूमिका पार पाडली.’’
डॉ. श्रीकृष्ण मुंडे यांनी पाहुण्यांची ओळख करुन दिली. प्रा.अनिल पवळ यांनी सूत्रसंचालन केले. कार्यक्रम पार पडण्यासाठी अध्यक्ष कमलजितसिंह मेहता, उपाध्यक्ष जसमितसिंह वालिया, रेणुका शेजुळ, डॉ.तनप्रीतकौर मेहता, बालाजी म्हस्के, भगवंत सिंग, कोटूसिंग यांनी परिश्रम घेतले.