आरक्षण सोडतीच्या ठिकाणी शासकीय वाहनांनाच प्रवेश

चिंचवड, ता. १० : चिंचवडमधील प्रा. रामकृष्ण मोरे प्रेक्षागृहात महानगरपालिकेच्या आगामी निवडणुकीसाठी मंगळवारी (ता. ११) आरक्षण सोडत निघणार आहे. या कार्यक्रमाचे सुरळीत आयोजन व्हावे म्हणून प्रशासनाने कडक सुरक्षा आणि वाहतूक व्यवस्था लागू केली आहे. याचा एक भाग म्हणून मंगळवारी प्रा. रामकृष्ण मोरे प्रेक्षागृह परिसरात शासकीय वाहने वगळता सर्व प्रकारच्या वाहनांना प्रवेशबंदी राहील. तेथे कुणीही खाजगी किंवा अनधिकृत वाहने आणू नयेत, अशी सूचना महापालिकेच्या निवडणूक विभागाने दिली आहे. मंगळवारी वाहतूक नियंत्रणासाठी पोलिस बंदोबस्त ठेवण्यात येईल. परिसरात केवळ अधिकृत परवानाधारक व्यक्तींनाच प्रवेश मिळेल. नागरिकांनी प्रशासनाला सहकार्य करून वाहतुकीबाबत शिस्त राखावी, असे आवाहनही करण्यात आले.
-----