लाडक्या बहिणींचे डोळे ‘मोबाईल मेसेज’कडे

चिंचवड, ता. १८ ः राज्यात गेल्या वर्षी जुलै महिन्यात सुरू झालेल्या ‘लाडकी बहीण’ योजनेअंतर्गत पात्र महिलांच्या खात्यात काही महिने दीड हजार रुपये जमा झाले. गेल्या दोन ते तीन महिन्यांचे हप्ते मात्र जमा झाले नसल्याने अनेक महिला ‘मोबाईल मेसेज’ची वाट बघत आहेत. सुरवातीला योजनेला मोठा प्रतिसाद मिळाला.
अनेक बहिणींनी याला भरभरून पाठिंबा देत सरकारला आशीर्वाद सुद्धा दिले. सरकार स्थापन झाल्यानंतर योजनेच्या अंमलबजावणीला हळूहळू नियमांची चौकट लागत गेली. एकामागून एक नवे नियम जाहीर होत गेले आणि त्याचा थेट परिणाम लाभार्थ्यांच्या संख्येवर झाला. काही महिलांचे हप्ते थांबले, तर काहींच्या खात्यात पैसे जमा होण्यास विलंब होत आहे. त्यामुळे ज्या महिलांना नियमितपणे हप्ता मिळत होता, त्यांनाही आता पुढील हप्ता नेमका केव्हा जमा होणार, याबाबत खात्री नाही.
आज अनेक लाडक्या बहिणी ‘बँकेकडून काही मेसेज येतो का,’, ‘आज पैसे जमा झाले होतील का,’ अशा प्रश्नांनी अस्वस्थ झाल्या आहेत. काही ठिकाणी ‘हप्ता जमा झाला का नाही,’ याबाबत महिलांमध्ये चर्चा सुरू आहे. पैसे अद्याप खात्यात न आल्याने ‘आपला पत्ता कट तर झाला नाही ना,’ अशी शंकाही अनेक जणींच्या मनात घर करून बसली आहे.
या योजनेमुळे निर्माण झालेल्या अपेक्षा आणि प्रत्यक्षात येणाऱ्या अडचणी यांच्यातील दरी आता स्पष्टपणे दिसू लागली आहे. त्यामुळे शासनाने नियमांची स्पष्ट माहिती देत हप्त्याबाबत ठोस भूमिका घ्यावी, अशी अपेक्षा लाभार्थी महिला व्यक्त करीत आहेत. तोपर्यंत, लाडक्या बहिणींचे लक्ष ‘मोबाईल मेसेज’कडे लागून राहिले आहे.
---
फोटो आयडी 77630