ऑस्ट्रेलिया मध्ये ट्रायफिटझोन संघाची भरारी

चिंचवड, ता. १९ ः ऑस्ट्रेलिया येथे पार पडलेल्या ‘आयर्नमॅन वेस्टर्न-एशिया पॅसिफिक चॅम्पियनशिप’ या जागतिक स्पर्धेत भारताच्या ट्रायफिटझोन संघाने उल्लेखनीय कामगिरी केली. स्पर्धेत संघाच्या सात खेळाडूंनी यशस्वीरीत्या आयर्नमॅन पूर्ण केली.
स्पर्धेत स्वप्नील चिंचवडे यांनी १३ तास सहा सेकंद, पांडुरंग बोडके यांनी १३ तास दोन मिनिटे १३ सेकंद, सचिन वाकडकर यांनी १३ तास २५ मिनिटे ४३ सेकंद, तर अमित लोंढे यांनी १३ तास ५३ मिनिटे १७ सेकंदात आयर्नमॅन पूर्ण केली. तसेच रोहित क्षीरसागर, शेखर गवळी आणि वैभव ठोंबरे या तिघांनी १४ तास ४० मिनिटांत एकत्रितपणे रेस पूर्ण करत भारतीय तिरंग्यासह ‘फिनिश लाईन’ ओलांडली.
स्पर्धेत ३.८ किमी समुद्रात पोहणे, प्रचंड वाऱ्याच्या प्रतिकूल परिस्थितीत १८० किमी सायकलिंग आणि बदलत्या हवामानात ४२ किमी मॅरेथॉन धावणे अशी तीन टप्प्यांची कसोटी असते.
या सात खेळाडूंमध्ये गवळी यांची ही पहिली स्पर्धा होती, तर उर्वरित खेळाडूंनी दुसऱ्यांदा तर चिंचवडे यांनी तिसऱ्यांदा आयर्नमॅन पूर्ण करण्याचा मान मिळवला. दरम्यान, ठोंबरे यांचा सायकलिंग टप्प्यात १०७ किमीवर अपघात झाला. मात्र गंभीर परिस्थितीतही त्यांनी स्पर्धा यशस्वीरीत्या पूर्ण केली.