नागरिकांना झिडकारणारा ठेकेदार वठणीवर

देहू, ता. २८ : ‘‘शहराच्या ओंकार सोसायटीमधील चेंबर ताबडतोब कटरच्या सहाय्याने काढावे. तसेच गटार दुरुस्त करून द्यावे,’’ असे आदेश देहू नगरपंचायतीचे अभियंता संघपाल गायकवाड यांनी ठेकेदाराला दिले आहेत.
शहरात विविध भागांमध्ये गटार स्वच्छतेसाठी खासगी ठेकेदाराची नेमणूक करण्यात आलेली आहे. मात्र, काही ठिकाणी नागरिकांना उडवाउडवीची उत्तरे देण्यात येतात. याचाच एक भाग म्हणून ओंकार सोसायटीमधील गल्ली क्रमांक तीनमध्ये चेंबरवर सिमेंट पडले आहे. त्यामुळे हे चेंबर रस्त्यामध्ये रुतलेले आहे. ते काढून गटार स्वच्छ व्हावे, अशी मागणी येथील नागरिक करत होते. मात्र, ‘‘माझ्याकडे चेंबर काढण्यासाठी कोणतेही साधन नाही. ते नगर पंचायतीकडून आणा’’ अशी उत्तरे ठेकेदाराकडून नागरिकांना मिळत होती. दुरुस्तीची मागणी नागरिकांनी वारंवार केली होती. मात्र, कर्मचाऱ्यांनी त्याकडे दुर्लक्ष केले.
त्यामुळे नागरिकांनी ठेकेदाराची तक्रार अभियंता संघपाल गायकवाड यांच्याकडे केली होती.