पार्किंग नाही, फलक अस्पष्ट तरीही टोइंगचा दंड

देहू, ता. १२ : शहरात वाहन पार्किंगविषयी योग्य माहिती दिली जात नाही. तसेच त्यासंबंधीचे फलक स्पष्ट नाहीत. त्यामुळे भाविक व नागरिकांना त्रास सहन करावा लागत आहे. पोलिसांनी आधी योग्य पार्किंग सुविधा उपलब्ध करावी आणि मगच दुचाकीस्वारांवर कारवाई करावी, अशी मागणी नागरिकांनी केली आहे.

देहूतील मुख्य कमान ते चौदा टाळकरी कमान या दरम्यान रस्त्यालगत सम-विषम तारखेनुसार वाहन लावण्याचे फलक लावले आहेत. पण, त्यावरील रंग आता उडाला आहे. ते स्पष्टपणे दिसत नाहीत. येथे आठवड्यातून दोन वेळा बाजार भरतो. अनेक महिला वाहने रस्त्याकडेला उभी करून खरेदीसाठी बाजारात जातात. त्याच वेळी तळवडे बाजूने येणारे टोइंग वाहन दवंडी न देता दुचाकी वाहने उचलून नेते आणि थेट तळवडे पोलिस ठाण्यात ठेवते. दरम्यान, नव्याने येणाऱ्या भाविकांना तळवडे पोलिस ठाणे कोठे आहे, हेदेखील माहिती नसते. अशा वेळी चौकशी करत पोलिस ठाणे गाठत त्यांना वाहनावरील दंड रावा लागतो.

चारचाकींकडे दुर्लक्ष, दुचाकीच लक्ष्य
देहू मुख्य कमान ते चौदा टाळकरी कमान मार्गावर दोन्ही बाजूंनी चारचाकी वाहने मोठ्या प्रमाणात पार्क केली जातात. त्यामुळे वारंवार वाहतूक कोंडी होत असते. दुचाकींवर कारवाई होत असताना चारचाकींवर मात्र दुर्लक्ष केले जात असल्याचा आरोप नागरिकांनी केला आहे.