पीएमपी बससेवा इंदोरीतून पूर्ववत करा

इंदोरी, ता.२४ : तळेगाव-चाकण, तळेगाव-आळंदी व तळेगाव -देहू या मार्गावरील पीएमपी बससेवा इंदोरी बाह्यवळण मार्गाने सुरु आहे. सदर बससेवा पूर्ववत इंदोरी गावातून सुरू करावी, अशी मागणी ग्रामस्थांनी केली आहे.
इंदोरी गावातून जाणाऱ्या तळेगाव-चाकण रस्त्याचे काम सुरू होते. तसेच आंद्रा, जाधववाडी व आसखेड धरणांचे पाणी पिंपरी-चिंचवड मनपा नेत आहे. सदर जलवाहिनी टाकण्याचेही काम सुरू होते. त्यामुळे इंदोरी गावातून मोठी चारचाकी वाहनांच्या वाहतुकीस अडचण होत होती. त्यामुळे ग्रामपंचायत प्रशासनाने पीएमपीएमएल व्यवस्थापनास पत्र पाठवत १७ जूनपर्यंत बससेवा बाह्यवळण रस्त्याने सुरु ठेवावी. त्याप्रमाणे गेली दोन महिने ही बससेवा गावाबाहेरून जात आहे.
आता रस्त्याचे आणि जलवाहिनीचे काम पूर्ण झाले आहे. तसेच एस.टी.बस, कामगारांच्या बस तसेच स्कूल बस पूर्ववत
गावातून सुरू झाल्या आहेत. पण, पीएमपी बस मात्र अजूनही गावाबाहेरून जात आहेत. त्यामुळे प्रवाशांना गैरसोय सहन करावी लागत आहे.
आता शाळा व महाविद्यालये सुरू झालेली आहेत. पण, पीमएपी बस गावाबाहेरून जात असल्याने विद्यार्थ्यांचे हाल होत आहेत. त्यामुळे पीएमपी प्रशासनाने तातडीने निर्णय घ्यावा, ग्रामपंचायत प्रशासनाने पाठपुरावा करुन प्रवाशांचे हाल थांबवावेत, अशी मागणी माजी जिल्हा परिषद सदस्य प्रशांत ढोरे, मावळ कृषी बाजार समितीचे संचालक दिलीप ढोरे व ज्येष्ठ नागरिक संघाचे अध्यक्ष नामदेव शिंदे यांनी केली आहे.