भंडारा डोंगर पायथ्याला २३ जानेवारीपासून हरिनाम सप्ताह

माघ शुद्ध दशमी सोहळ्यात यंदा संत सोहळाही

भंडारा डोंगर पायथ्याला २३ जानेवारीपासून प्रारंभ; ज्ञानेश्वरी, गाथा पारायण सोहळा

इंदोरी, ता. २३ ः संत तुकाराम महाराज प्रकटदिन व माघ दशमी अनुग्रह दिनानिमित्त श्रीक्षेत्र भंडारा डोंगर देवस्थानतर्फे २३ ते ३१ जानेवारी दरम्यान अखंड हरिनाम सप्ताह व संगीत गाथा पारायण तसेच ग्रंथराज ज्ञानेश्वरी पारायण सोहळा व संत महात्म्यांचा उत्सव होणार आहे. दरवर्षी डोंगरावर होणारा हा सोहळा यंदा पायथ्याला सुमारे शंभर एकर क्षेत्रावर होणार आहे, अशी माहिती भंडारा डोंगर ट्र्स्टचे अध्यक्ष बाळासाहेब काशीद, ज्येष्ठ कीर्तनकार ज्ञानेश्वर महाराज कदम यांनी दिली.

संत ज्ञानेश्वर महाराज यांचा ७५० वा जन्मोत्सव सोहळा, संत नामदेव महाराज, संत जनाबाई आदी १४ संतांचा ६७५ वा समाधी सोहळा, संत जनार्दनपंत देशपांडे यांचा ४५० वा संजीवन समाधी सोहळा, संत तुकाराम महाराज यांचा ३७५ वा सदेह वैकुंठगमन सोहळा, संत सावता महाराज यांचा ७७५ वा जन्मोत्सव सोहळा व संत नारायण महाराज देहूकर यांचा ३७५ वा जन्मोत्सव सोहळा होईल.

सप्ताहात दररोज काकडा भजन, गाथा व ज्ञानेश्वरी पारायण, सकाळी अकरा ते साडेबारा आणि सायंकाळी सहा ते आठ कीर्तन, दुपारी भोजन वनित्यनेमाचे भजन, दुपारी संत चरित्रकथा, रात्री भोजन आणि त्यानंतर जागर होणार आहे. दुपारी साडेतीन ते पाच दरम्यान संत ज्ञानेश्वर महाराज जीवन चरित्र कथा ज्ञानेश्वर महाराज कदम करणार आहेत. पारायण व्यासपीठ नेतृत्व नाना महाराज तावरे हो करणार आहेत.

या सप्ताहात २३ ते ३० जानेवारी दरम्यान अनुक्रमे बंडातात्या कराडकर, संजय महाराज पाचपोर, ॲड. जयवंत महाराज बोधले, चैतन्य महाराज देगलूरकर, अच्युत महाराज दस्तापूरकर, ज्ञानेश्वर महाराज कदम, केशव महाराज नामदास व ज्ञानेश्वर महाराज कदम यांची कीर्तने होणार आहेत. ३१ जानेवारीला सकाळी ९ ते ११ ज्ञानेश्वर महाराज कदम यांचे काल्याचे काल्याचे कीर्तन होणार आहे. २८ रोजी दुपारी एक ते तीन दरम्यान डॉ. भावार्थ देखणे व सहकाऱ्यांचे बहुरूपी भारुड होईल.

देहू ते भंडारा डोंगर दिंडीसोहळा
ता. २२ जानेवारी रोजी दुपारी तीन ते पाच दरम्यान देहू ते भंडारा डोंगर पायथा दिंडी सोहळा निघणार असून, त्यात प्रत्येकी ३७५ धर्म ध्वजधारी, कलशधारी, तुळशीधारी, कीर्तनकार, टाळकरी, मृदंगवादक, ब्रम्हवीणाधारी, चोपदार, तुकाराम नावाच्या व्यक्ती, ७५० ज्ञानेश्वर नावाच्या व्यक्ती, प्रत्येकी ६७५ नामदेव व जनाबाई नावाच्या व्यक्तींचा सहभाग असणार आहे. सायंकाळी ६ ते ७ शांतिब्रह्म मारोती महाराज कुऱ्हेकर यांचे कीर्तन होणार आहे.

वैशिष्‍ट्य काय
- पाच हजार गाथा वाचक
- कीर्तनाला एक हजार टाळकरी
- ज्ञानेश्वरीतील एका ओवीला एक याप्रमाणे ९०३२ वाचक
- कीर्तनाला २५ मृदंग वादक
- चोवीस तास ज्ञानदेव-तुकाराम भजन