शब्दरंग साहित्य कट्ट्याकडून प्राधिकरणामध्ये वारीचा आनंद

किवळे, ता. २७ : प्राधिकरण निगडी सेक्टर २५ येथील शब्दरंग कला साहित्य कट्टा समूहाने पंढरीच्या वारीचा आनंद साजरा केला. लहान मुलांपासून ते ज्येष्ठ नागरिकांपर्यंत सर्व वयोगटांतील लोकांनी सहभाग नोंदवला. पारंपरिक पोशाख, कपाळावर टिळा लावलेली वारकरी मंडळी, ढोल-ताशांच्या निनादात विठुनामाचा गजर करत रिंगणही झाले. विठ्ठल, रुक्मिणी, तुकोबा व वारकरी यांच्या वेशभूषेत लहान मुलांनी सहभागी होत वारीला रंगत आणली.
या वारीमध्ये ‘ज्ञानेश्वरी’ आणि ‘तुकाराम गाथा’ यांची फुलांनी सजवलेली पालखी अग्रभागी होती. प्रतिभा निफाडकर यांनी शंखध्वनी करून पालखीचे स्वागत केले. रांगोळ्यांनी सजवलेल्या मार्गावरून ही पालखी मारुती मंदिरात नेली. यानंतर मंदिर परिसरात संत साहित्यावर आधारित संगीत, नृत्य, नाट्य अशा बहुरंगी सादरीकरणांनी वातावरण भारून टाकले.
शब्दरंग कट्ट्याच्या अध्यक्षा ज्योती कानेटकर, कार्यकारिणी सदस्य प्रियंका आचार्य, चंद्रशेखर जोशी, माधुरी ओक, अशोक अडावदकर यांनी नियोजन केले.