मुकाई चौकामध्ये प्रचंड वाहतूक कोंडी वाहतूक पोलिसांची अनुपस्थिती, रुग्णवाहिकाही अडकली

किवळे, ता. १३ : मुकाई चौक परिसरात रविवारी रात्री वाहतूक पोलिस अनुपस्थित असल्याने चारही दिशांनी आलेल्या वाहनांमुळे प्रचंड वाहतूक कोंडी झाली. एका तासापेक्षा जास्तवेळ ही परिस्थिती राहिल्याने स्थानिक रहिवासी व द्रुतगती मार्गावर जाणारी वाहने दोन्ही अडकून पडले. याच काळात एक रुग्णवाहिकाही अडकली होती. त्यामुळे नागरिकांनी संताप व्यक्त केला.
रावेतकडून आलेल्या काही वाहनांनी शॉर्टकट म्हणून कोहिनूर इमारतीच्या पार्किंगमार्गे बापदेव पुलाकडे जाण्याचा प्रयत्न केला. त्यामुळे या दिशेने कोंडी आणखी वाढली. शिवाय काही वाहनचालकांनी रस्ता न सोडल्याने परिस्थिती पूर्णतः हाताबाहेर गेली.
वाहतूक नियंत्रणासाठी कोणतीही यंत्रणा उपस्थित नसल्याने नागरिक व प्रवाशांचे प्रचंड हाल झाले. किवळे व देहूरोड परिसरात सायंकाळी वर्दळ वाढते. त्यामुळे अशावेळी वाहतूक पोलिसांची उपस्थिती अत्यावश्यक आहे, अशी मागणी नागरिकांकडून करण्यात येत आहे.

फोटोः 04744