लोणावळ्यातील आजचा आठवडे बाजार रद्द

लोणावळा, ता. ९ : लोणावळा नगरपरिषद हद्दीत भरणारा शुक्रवारचा आठवडे बाजार शुक्रवारी (ता. १०) रद्द करण्यात आल्याची माहिती मुख्याधिकारी पंडित पाटील यांनी दिली. नगर परिषदेच्या वतीने भांगरवाडीत भुयारी गटार योजनेचे काम सुरू आहे. त्यामुळे इंद्रायणी पूल ते छत्रपती शिवाजी महाराज पुतळा दरम्यान वाहतूक बंद करण्यात आली आहे. लोणावळ्यातील आठवडे बाजार हा हनुमान टेकडी समोरील रस्त्यावर भरवण्यात येतो. सर्व वाहतूक ही पुरंदरे शाळा मैदानासमोरील रस्त्यावरून वळविण्यात आली आहे. वाहतूक या मार्गाने वळविण्यात आली असल्याने वाहतुकीची कोंडी होऊ नये म्हणून शुक्रवारचा आठवडे बाजार रद्द करण्यात आला. गेल्या आठवड्यातही बाजार रद्द करण्यात आला होता. आठवडे बाजार रद्द झाल्याने गैरसोय होऊ नये यासाठी बाजारातील भाजी विक्रेते, फेरीवाले, किरकोळ विक्रेत्यांनी नोंद घेण्याचे आवाहन करण्यात आले आहे.