गरोदर माता, बाळंतिणींसाठी स्वतंत्र कक्षाची उभारणी

लोणावळा, ता. २८ : येथील नागरी प्राथमिक आरोग्य केंद्रात लोकसहभागातून रुग्णांसाठी लसीकरण, गरोदर माता व बाळंतिणींसाठी स्वतंत्र कक्षाची उभारणी करण्यात आली आहे. लोणावळा नगरपरिषदेचे मुख्याधिकारी अशोक साबळे, तालुका आरोग्य अधिकारी डॉ. शेरॉन सोनवणे यांच्या हस्ते या कक्षाचे उद्‍घाटन करण्यात आले.
सार्वजनिक आरोग्य सेवा, पायाभूत सुविधा बळकटीसाठी शॅलेट हॉटेल्स व कन्सर्न इंडिया फाउंडेशनच्या वतीने हा उपक्रम सुरू केला आहे. उपमुख्याधिकारी शरद कुलकर्णी, शॅलेट हॉटेल्सच्या पर्यावरणीय, सामाजिक आणि प्रशासन विभागाच्या जनरल मॅनेजर जान्हवी परब, कन्सर्न इंडिया फाउंडेशनच्या हसीना दुभाष, ग्लोरिया भगत आदी यावेळी उपस्थित होते.
येथील संकेश्वर रुग्णालयात लोणावळा नगरपरिषद व शासनाच्या आरोग्य विभागाच्या वतीने नागरी प्राथमिक आरोग्य केंद्र सध्या संयुक्तपणे सुरू आहे. येथे लसीकरण, गरोदर व बाळंतीण मातांची काळजी, उच्च रक्तदाब व मधुमेह यांसारख्या असंसर्गजन्य आजारांचे परीक्षण आणि व्यवस्थापन तसेच कार्विकल, स्तन व तोंडाच्या कर्करोगाचे परीक्षण केले जाते. केंद्रात एक वैद्यकीय अधिकारी आणि १० सहाय्यक कर्मचारी यांचा समावेश आहे. २६ आशा कार्यकर्त्यांद्वारे दररोज सरासरी शंभर रुग्णांची सेवा केली जाते. तसेच दरमहा सुमारे ८० ते ९० गरोदर व बाळंतीण मातांपर्यंत पोहोचले जाते. मात्र, मर्यादित सुविधा असल्याने रुग्णांना चांगली सेवा देता येत नाही, अशा रुग्णांना इतर रुग्णालयांमध्ये पाठवावे लागते. त्यामुळे शॅलेट हॉटेल्स व कन्सर्न इंडिया फाउंडेशनच्या सहकार्याने गरोदर व बाळंतीण मातांची काळजी आणि लसीकरणासाठी दोन स्वतंत्र खोल्यांची उभारणी करण्यात आली.