ट्रकमधील पाइप कोसळल्याने दोन महिलांचा मृत्यू

लोणावळा. ता. १३ : स्कूटर, कार आणि ट्रकच्या अपघातात दोन महिलांचा मृत्यू झाला; तर पाच जण जखमी झाले. हा अपघात बोरघाटात पुणे-मुंबई जुन्या महामार्गावर शनिवारी सायंकाळी सात वाजण्याच्या सुमारास झाला.
महामार्ग पोलिसांनी दिलेल्या माहितीनुसार, ‘‘ऋतुजा चव्हाण (वय २६, रा. नऱ्हे, पुणे), अंकिता शिंदे (वय २८, रा. मोशी) अशी मृतांची नावे आहे. तर स्कूटरस्वार वैभव गलांडे (वय २९, रा. वारजे, पुणे), कारमधील सोनाली खडतरे (वय ३०, रा. मोशी), शिवराज खडतरे (वय ६), ललित शिंदे (वय ३१), लता शिंदे (वय ५०) हे जखमी झाले आहेत.
या ट्रकद्वारे खोपोलीहून लोणावळ्याकडे लोखंडी पाइप वाहून नेले जात होते. दरम्यान, ट्रकचालकाने अचानक ब्रेक लावला. त्यामुळे धक्का बसून ट्रकमधील पाइप सरकले आणि मागील ॲक्टिवावरील सहप्रवासी महिला आणि कारमधील महिलेच्या अंगावर पाइप कोसळले. त्यात त्यांचा जागीच मृत्यू झाला. तर ॲक्टिवाचालक, कारचालक आणि कारमधील मागे बसलेल्या महिलेसह लहान मुलगा जखमी झाला. त्यांच्यावर खोपोली शहरातील खासगी रुग्णालयात उपचार सुरू आहेत.
घटनेची माहिती मिळताच बोरघाट वाहतूक मदत केंद्र पोलिस, आयआरबी कर्मचारी, देवदूत यंत्रणा व अपघातग्रस्तांचा मदतीसाठी संस्थेचे स्वयंसेवकांनी धावून आले. घटनेचा अधिक तपास पोलिस निरीक्षक सचिन हिरे यांच्या मार्गदर्शनाखाली सुरू आहे.