गोविंदांना लाखोंचा मलिदा चाखण्याची संधी

लोणावळा, ता. १३ : लोणावळ्यात यंदा दहीहंडीची धूम पाहायला मिळणार आहे. लहानग्यांपासून मोठ्यांपर्यंत सर्वांमध्ये दहीहंडीचा उत्साह ओसंडून वाहणार आहे. यंदाही विविध संघटनांकडून मोठमोठ्या दहीहंडी उभारण्यात आल्या असून, गोविंदा पथकांना लाखोंचा मलिदा चाखण्याची संधी मिळणार आहे.

मावळ वार्ता फाउंडेशन यांच्या वतीने साजरी करण्यात येत असलेल्या दहीहंडी महोत्सवाचे यंदाचे २४ वे वर्ष असून यंदा ‘आरोग्यमं धनसंपदा’ ही उत्सवाची संकल्पना आहे. फाउंडेशनचे अध्यक्ष नासीर शेख व इतर पदाधिकाऱ्यांनी पत्रकार परिषदेत उत्सवाची माहिती दिली. संजय अडसुळे, मनीषा बंबोरी, संदीप वर्तक, नंदू वाळंज, डॉ. किरण गायकवाड, जितेंद्र बोत्रे, नवीन भुरट, जितेंद्र कल्याणजी, हेमंत मुळे, बापूलाल तारे, ज्ञानेश्वर येवले, बाळासाहेब फाटक, बाबूभाई शेख आदी उपस्थित होते. यंदा जवळपास बारा लाख रुपयांची सामूहिक बक्षिसांचा वर्षाव गोविंदांवर होणार आहे. संवाद शाळेतील विशेष मुले व वारकऱ्यांच्या हस्ते दहीहंडीचे पूजन होत महोत्सवाचे उद्‍घाटन होणार आहे.

सोळा लाखांची बक्षिसे
येथील संकल्प युवा प्रतिष्ठानच्या वतीने जयचंद चौक येथे दहीहंडी उत्सवाचे आयोजन करण्यात आले असल्याची माहिती प्रतिष्ठानचे अध्यक्ष विनोद भोगले होगले यांनी दिले पत्रकार परिषदेत दिली. यावेळी बाळासाहेब पायगुडे, मंजुश्री वाघ, नासीर शेख, राजेंद्र चौहान, धवल चौहान, ॲड. ज्योती सोनावले, प्रफुल काकडे, अजिंक्य कुटे आदी उपस्थित होते. प्रतिष्ठानच्या वतीने १५ लाख ९९ हजार ९९९ रुपयांची बक्षिसांचा मलिदा गोविंदा पथकांना चाखता येणार आहे. मावळ, रायगडसह मुंबईतील पन्नास गोविंदा पथकांनी नोंदणी केली आहे. यंदा दहीहंडी पूजनाचा मान तृतीय पंथीयांना देण्यात आला असून, यावेळी कास्टिंग डायरेक्टर अक्षय खिरीड, स्थानिक रिल्स्टार, सोशल मीडिया इन्फ्लुएंसर यांची उपस्थिती असणार आहे. येथील लोकशाहीर सखाराम तारे, पत्रकार व प्रशासनातील चंद्रकांत जोशी, इतिहास अभ्यासक आनंद नाईक, क्रीडापटू ज्योती कंधारे, उद्योजक मिलिंद वाळंज यांचा विशेष गौरव होणार आहे. विजेत्या पथकास १२ फूट उंचीचा चषक, बालगोपाळास सायकल, बाळकृष्णाची मूर्ती भेट व लकी ड्रॉ विजेत्यास इलेक्ट्रिक स्कूटर भेट ही यंदाची वैशिष्ट्य आहे.