लोणावळा-खंडाळा पर्यटकांच्या स्वागतास आतूर

लोणावळा, ता.१३ : सध्या १५ ऑगस्ट स्वातंत्र्य दिनास पर्यटनाचा ‘ट्रेंड’ वाढत असताना यंदा लोणावळा-खंडाळ्यास थंडा प्रतिसाद मिळत असल्याचे चित्र आहे. हॉटेल्स व रिसॉर्टचे बुकिंग पन्नास ते साठ टक्क्यांच्या आसपास असून वीकेंडला स्वातंत्र्य दिनास पतेती, जन्माष्टमी जोडून आली आहे. सलग सुट्ट्यांमुळे लोणावळ्यात पर्यटकांची गर्दी होण्याची आशा व्यावसायिक बाळगून आहेत.
लोणावळा व खंडाळा ही ठिकाणे पर्यटकांच्या आकर्षणाची केंद्रे असल्याने पर्यटक लोणावळा परिसरातील भुशी डॅम, राजमाची, लोहगड, एकवीरा-भाजे लेणी परिसर, पवना धरण परिसरात सर्व मोसमांमध्ये गर्दी करत असतात. पर्यटकांचे सर्वाधिक पसंती असलेल्या लायन्स पॉइंट, खंडाळ्यातील राजमाची उद्यान, सनसेट पॉइंट येथेही पर्यटकांची पंसती मिळते. पावसाळ्यात वर्षाविहारासाठी पर्यटकांना वेड लागते. लोणावळ्यात वर्षाविहारासाठी लाखोंच्या संख्येने भेट देतात.
या दिवसांत लोणावळ्यात १५ ऑगस्टपर्यंत बुकिंग फुल्ल होत असते. या काळात लॉजिंगला सर्वाधिक दर मिळतो.
मात्र, या कालावधीत पडणारा उच्चांकी पडणारा पाऊस, वाढत्या दुर्घटना यामुळे येथील पर्यटनस्थळे बंद करण्यात आल्यामुळे पर्यटकांच्या आनंदावर विरजण पडले. त्यामुळे व्यावसायिकांपुढे चिंतेचे वातावरण आहे.
हॉटेल व्यावसायिक अनिश गणात्रा म्हणाले,‘‘मध्यम दर्जाच्या हॉटेल्सना फारसे बुकिंग नाही. तुलनेत स्टार कॅटेगरीच्या रिसॉर्ट्सना चांगला प्रतिसाद मिळत आहे.’’
हॉटेल व्यावसायिक आशिष खंडेलवाल म्हणाले,‘‘लोणावळ्यात क्षमतेच्या निम्मेही बुकिंगही होऊ शकलेले नाही. उलट काही पर्यटकांनी बुकिंग रद्द करायला सुरूवात केली आहे.’’
स्थानिक व्यावसायिक समीर इंगळे म्हणाले,‘‘पर्यटन स्थळांवरील वाढते अपघात व पर्यटकांवर प्रशासनाची बंधने त्यामुळे अगोदरच फटका बसला आहे. १५ ऑगस्टपर्यंत पर्यटनाचा हंगाम मानला जातो व नंतर कमी होतो. या वीकेंडला सर्व काही सुरळीत झाले; तर थोडा फरक पडेल.’’

चांगल्या सुविधा, आल्हादायक वातावरण आणि ‘ॲक्टिव्हिटी’ची पर्यटकांकडून मागणी होत आहे. या पार्श्वभूमीवर
एमटीडीसीचे कार्ला येथील निवासस्थानातील १५ ऑगस्टपर्यंत बुकिंग जवळपास शंभर टक्के झाले आहे.
- साहिल भालेराव, निवास व्यवस्थापक, एमटीडीसी