वाकसई येथील रिसॉर्टमधून दहा लाखांचा ऐवज लंपास

लोणावळा, ता. ४ : वाकसई (ता. मावळ) गावच्या हद्दीत असलेल्या ट्रेजर आयलॅन्ड रिसॉर्ट्स येथील रूममधून अनोळखी चोरट्यांनी सुमारे १० लाख रुपये किमतीचा ऐवज लंपास केला आहे. रविवारी (ता. २) ही घटना घडली. सुमित्रा प्रल्हाद करेलिया (वय ५१, रा. देवाशिस सिटी, बोरखेडा, जि. कोटा, राज्यस्थान) यांनी याप्रकरणी फिर्याद दिली आहे. प्राथमिक माहितीनुसार, रविवारी सायंकाळी सहा वाजण्याच्या सुमारास पांढऱ्या रंगाचा फुल बाह्यांचा शर्ट, काळ्या रंगाची पॅन्ट आणि स्पोर्ट शूज परिधान केलेला एक अनोळखी तरुण व त्याच्या साथीदाराने येथील ट्रेजर आयलॅन्ड रिसॉर्टमधील रूम नं.१११ मध्ये उघड्या दरवाजातून आत प्रवेश करून दोन लाख रुपयांची रोख रक्कम तसेच सोन्याचे व डायमंडचे दागिने, मोबाईल फोन असा एकूण दहा लाख रुपयांचा ऐवज लंपास केला. लोणावळा ग्रामीण पोलिसांनी अज्ञात चोरट्यांच्या विरोधात गुन्हा दाखल केला असून पुढील तपास पोलिस उपनिरीक्षक वाघमारे करत आहेत.
---