कर्कश सायलेन्सरविरोधात कठोर कारवाईची मागणी

लोणावळा, ता. ९ : अल्पवयीन मुलांकडून मोटारसायकल चालविणे तसेच बदललेले कर्कश सायलेन्सर वापरणाऱ्या वाहनचालकांविरोधात कठोर कारवाई करावी, अशी मागणी विद्यानिकेतन एज्युकेशन ट्रस्टचे अध्यक्ष ॲड. माधवराव भोंडे यांनी लोणावळा पोलिसांकडे केली आहे.
पत्रात म्हटले आहे की, ‘‘अनेक युवक मोटारसायकलला बदललेले सायलेन्सर बसवून मोठा, कर्कश आणि त्रासदायक आवाज निर्माण करतात. यामुळे नागरिकांना विशेषतः रुग्ण, वृद्ध, विद्यार्थी व महिलांना मानसिक त्रास सहन करावा लागतो. सर्वोच्च न्यायालयाने घालून दिलेल्या ध्वनीमर्यादांचे हे उल्लंघन असून, याकडे प्रशासनाने गांभीर्याने लक्ष द्यावे. अल्पवयीन वाहनचालक व बेकायदेशीर सायलेन्सर वापरणाऱ्यांविरुद्ध तातडीने कठोर कारवाई करून त्यांचे वाहन परवाने निलंबित करावेत. तसेच, शाळा, महाविद्यालये व सार्वजनिक ठिकाणी गस्त वाढवून शहरातील ध्वनिप्रदूषण नियंत्रणात आणावे.
---