लोणावळा नगर परिषदेसाठी अर्जांचा पाऊस

लोणावळा, ता. १७ : नगर परिषद निवडणुकीसाठी उमेदवारी अर्ज दाखल करण्याच्या शेवटच्या दिवशी मोठी चढाओढ दिसून आली. अर्ज दाखल करण्याच्या शेवटच्या दिवशी (ता.१७) तब्बल ६३ अर्ज दाखल झाले. तर, आतापर्यंत १५२ अर्ज दाखल झाले आहेत. यामध्ये ७३ पुरुष आणि ७९ महिला इच्छुकांचा समावेश आहे.

नगराध्यक्ष पद हे अनुसूचित जाती प्रवर्गासाठी (एससी) राखीव आहे. अखेरच्या दिवशी या प्रवर्गातून नगराध्यक्ष पदासाठी सात जणांनी अर्ज दाखल केले असून एकूण दहा अर्ज दाखल झाले आहे. नगर परिषद निवडणुकीत नगरसेवकांसाठी १३ प्रभागांमध्ये २७ जागा आहेत. शिवसेना-रिपाइं (आठवले गट) युतीचे उमेदवार सूर्यकांत वाघमारे, भाजपचे उमेदवार गिरीश कांबळे यांच्यासह बलराज रिले, शशिकांत जाधव, विनायक शिंदे, सुभाष सोनवणे यांनी शक्तिप्रदर्शन करत नगराध्यक्ष पदासाठी अर्ज दाखल केले. दिवसभर उमेदवार, त्यांचे समर्थक, विविध पक्षांचे कार्यकर्ते व स्थानिक नागरिक यांची गर्दी उमेदवारी अर्ज दाखल केंद्रावर दिसून आली. अनेकांनी सकाळपासूनच रांगा लागल्या होत्या, तर काही इच्छुक दुपारनंतर उमेदवारीसाठी दाखल झाल्याचे दिसून आले.

आज अर्ज छाननी
या दाखल अर्जांची छाननी मंगळवारी (ता.१८) होणार आहे. १९ ते २१ नोव्हेंबरदरम्यान दुपारी दोन वाजेपर्यंत अर्ज माघारीची मुदत आहे. त्यानंतर अंतिम यादी जाहीर होणार असून सर्वांचे लक्ष त्याकडे लागले आहे. निवडणुकीत पक्षीय रणनीती, स्वबळावर लढणारे उमेदवार, तर काहींच्या पक्षांतरामुळे राजकीय समीकरणांना वेग येण्याची चिन्हे आहेत.