आंतरभारती बालग्राम स्कूलचे ‘लीड २०२५’ परिषदेत यश

लोणावळा, ता. १५ : बी. के. बिर्ला पब्लिक स्कूल यांच्या वतीने आयोजित ‘लीड २०२५ – प्रिन्सिपल्स कॉन्क्लेव्ह’ या राष्ट्रीय स्तरावरील शैक्षणिक परिषदेत भुशी येथील आंतरभारती बालग्राम हायस्कूलने उल्लेखनीय यश संपादन केले.
“२०३०साठी शाळांची पुनर्कल्पना-भविष्यासाठी सज्ज शिक्षणासाठी नेतृत्व” या विषयावर देशभरातील ५८ नामांकित शाळांनी व्हीजन २०३०’ सादर केले. सहा शिक्षणतज्ज्ञांच्या परीक्षक मंडळाने यामधून १३ शाळांची निवड केली. अंतिम फेरीसाठी निवड झालेल्या चार शाळांमध्ये आंतरभारती बालग्राम स्कूलचा समावेश होता.
अंतिम फेरीत शाळेचे मुख्याध्यापक डॉ. संदेश कदम यांनी प्रभावी सादरीकरण केले. त्यांच्या शैक्षणिक संकल्पनेला परीक्षकांकडून विशेष प्रशंसा मिळाली. या उत्कृष्ट कामगिरीमुळे आंतरभारती बालग्राम स्कूलने प्रथम उपविजेतेपद पटकावले. यासाठी शाळेला रु. ७५ हजार रोख पारितोषिक, ट्रॉफी, प्रमाणपत्र प्रदान करण्यात आले.
याशिवाय, शाळेला ‘सर्वोत्तम नावीन्यपूर्ण व शाश्वतता उत्कृष्टता पुरस्कार’ रू. ५ हजारचे ॲमेझॉन गिफ्ट व्हाउचर तसेच प्रभावी सादरीकरणासाठी ‘प्रेक्षक पसंतीचा पुरस्कार’ रु. १० हजारचे ॲमेझॉन गिफ्ट व्हाउचर देऊन गौरविण्यात आले. या परिषदेच्या निमित्ताने बी. के. बिर्ला पब्लिक स्कूलच्या मुख्य कार्यकारी अधिकारी यांनी आयएससीमधील एका विद्यार्थिनीच्या शिक्षणाचा आजीवन खर्च उचलण्याची घोषणा केली.
या यशाबद्दल आयएससीच्या एक्झिक्युटिव्ह डायरेक्टर मेधा ओक, संस्थेचे ट्रस्टी संतोष चव्हाण, शिक्षकवृंद, पालक, ग्रामस्थ, आजी-माजी विद्यार्थी यांनी प्राचार्य डॉ. कदम व आंतरभारती बालग्राम स्कूलचे अभिनंदन केले