मोशीतील स्वच्छतागृहाची देखभालीअभावी दुरवस्था

मोशी, ता. ३ : पिंपरी चिंचवड महानगरपालिकेच्यावतीने काही वर्षांपूर्वी मोशीतील महापालिका शाळेच्या पाठीमागे, पुणे-नाशिक महामार्गालगत नागरिकांसाठी सार्वजनिक स्वच्छतागृह उभारण्यात आले आहे. मात्र, देखभालीअभावी त्याची दुरवस्था झाल्याने परिसरातील नागरिकांमध्ये नाराजी व्यक्त होत आहे.
स्वच्छतागृहाच्या परिसरात अस्वच्छता वाढली आहे. सुरक्षारक्षकासाठी बांधण्यात आलेल्या छोट्या खोलीचा वापर काही व्यावसायिक स्वतःचे साहित्य ठेवण्यासाठी करत असल्याचे दिसून आले. एका व्यावसायिकाने तर आपल्या रसाच्या गुऱ्हाळातील साहित्यही येथे ठेवले असल्याचे आढळून आले. या खोलीच्या दरवाजाला रात्री दरवाजा व कुलूप लावले जाते. मात्र, काही नागरिक ते तोडून आतमध्ये साहित्य ठेवतात. सुरक्षा रक्षक गरीब व असहाय असल्याने त्याचे परिस्थितीवर नियंत्रण राहिलेले नाही.
महिलांचे स्वतंत्र स्वच्छतागृहही अस्वच्छ अवस्थेत असून त्यातील सॅनेटरी पॅड मशीन दीर्घकाळापासून बंद आहे. स्वच्छता व देखभालीकडे दुर्लक्ष झाल्यामुळे परिसरात दुर्गंधी व गैरसोयी निर्माण झाल्या आहेत. या ठिकाणचा परिसर नियमित स्वच्छ ठेवावा, सुरक्षारक्षकांची नियुक्ती करून सुरक्षित करण्यात यावा, अशी मागणी स्थानिक नागरिकांनी महानगरपालिकेकडे केली आहे.