रावेतमधील शिंदे वस्ती चौक वाहतूक कोंडीचे नवे केंद्र

रावेत, ता.११ : रावेत परिसरातील शिंदे वस्ती चौक हा अलीकडे वाहतूक कोंडीचे नवीन डोकेदुखी केंद्र ठरत आहे. सिग्नल यंत्रणेचा अभाव, अनधिकृत पार्किंग तसेच हातगाड्यांच्या अतिक्रमणांमुळे इथे वाहतूक सतत ठप्प होत आहे. त्यामुळे नागरिक, विद्यार्थी आणि वाहनचालकांना मोठ्या त्रासाला सामोरे जावे लागत आहे.
या चौकातून मुख्य रस्त्यावर वाहने सातत्याने अडकून राहत असल्याने अपघाताची शक्यता वाढली आहे. विशेषतः सायंकाळच्या वेळेत ही समस्या तीव्र होते. वाहतुकीचे नियोजन नसल्यामुळे परिस्थिती दिवसेंदिवस बिघडत चालली आहे. त्यामुळे शिंदे वस्ती चौकात तत्काळ सिग्नल यंत्रणा बसवावी, अनधिकृत पार्किंग व हातगाड्यांचे अतिक्रमण हटवावे, वाहतूक पोलिसांची नेमणूक करावी, अशी मागणी स्थानिक नागरिकांकडून केली जात आहे. स्थानिक लोकप्रतिनिधी आणि नागरिकांनी प्रशासनाला वारंवार कळवूनही अद्याप कोणतीही ठोस कारवाई झालेली नाही. त्यामुळे लवकरच योग्य पावले उचलली नाहीत; तर ही समस्या आणखी गंभीर होण्याची भीती नागरिकांनी व्यक्त केली आहे.
वाहनचालक नंदिनी गोसावी म्हणाल्या, ‘‘रोज सकाळी आणि संध्याकाळी वाहतूक कोंडीचा सामना करावा लागतो आहे. त्यामुळे कार्यालयाला जाण्यास उशीर होतो. लवकर ही कोंडी फुटावी यासाठी प्रयत्न करावेत.’’
उमेश रुद्रावर म्हणाले, ‘‘सिग्नल व्यवस्थित नाही. वाहनचालक कोंडीत अडकून पडतात. त्यातून आमची सुटका करावी.’’