निगडीतील उड्डाणपुलाखाली खड्ड्यांमुळे वाहतूक विस्कळित

निगडी, ता. ५ ः निगडीतील लोकमान्य टिळक चौक येथे कै. मधुकर पवळे उड्डाणपुलाखाली खड्डे पडल्याने वाहनचालकांचे हाल होत आहेत. सकाळ-सायंकाळच्या गर्दीच्या वेळी वाहतूक विस्कळित होऊन मोठ्या प्रमाणावर कोंडी निर्माण होत आहे.
सततच्या पावसामुळे रस्त्यावरील डांबर उखडून खड्डे पडले आहेत. यामुळे दुचाकीस्वार व चारचाकी वाहनधारकांना अपघाताचा धोका कायम आहे. काही दुचाकी घसरल्याच्या किरकोळ घटना समोर आल्या आहे.
वाहतूक पोलिसांकडून तात्पुरती व्यवस्था करण्यात आली असली तरी रस्त्यावरील खड्ड्यांमुळे प्रवास मंदावला आहे. त्यामुळे नागरिकांना उड्डाणपुलाखालील मार्ग टाळून पर्यायी रस्त्यांचा वापर करावा लागत आहे. दररोज सकाळी ऑफिसला जाताना उड्डाणपुलाखालील खड्ड्यांमुळे प्रचंड त्रास सहन करावा लागतो. वेळ वाया जातो आणि अपघाताची भीतीही वाटते. प्रशासनाने तातडीने दुरुस्तीचे काम हाती घ्यावे, अशी मागणी स्थानिक नागरिकांनी केली.
पालिका दळण वळण विभाग आणि मेट्रो प्रशासनाकडून मात्र अजून कोणतीही ठोस कारवाई झालेली नाही. रस्त्यांची दुरुस्ती तातडीने न झाल्यास आगामी दिवसांत परिस्थिती अधिक गंभीर होण्याची भीती व्यक्त केली जात आहे.