ज्योतिबानगर ते सोनवणे वस्ती रस्त्याची दुरवस्था

निगडी, ता. १५ : तळवडे (ज्योतिबानगर) लघुउद्योग परिसरातून सोनवणे वस्तीकडे जाणाऱ्या रस्त्याची दुरवस्था झाली आहे. रस्त्यावर जागोजाग खड्डे पडले आहेत. तसेच कित्येक वर्षे या रस्त्याचे डांबरीकरण करण्यात आले नाही. त्यामुळे त्वरित दुरुस्तीसह या रस्त्याचे रुंदीकरण करण्याची मागणी येथील नागरिकांनी केली आहे.
तळवडे भागातील लघुउद्योग परिसरातून चिखली सोनवणे वस्ती भागाला जोडणाऱ्या या रस्त्यावर प्रचंड वाहतुकीचा ताण आहे. वाहनांची वर्दळ या रस्त्यावर सतत असते. त्यामुळे दिवसभर रस्त्याच्या कडेला असणाऱ्या रहिवासी नागरिकांसह दुकानदार यांना धुळीचा त्रास सहन करावा लागतो. काही जागेवर मोठे खड्डे पडल्याने वाहन चालकांना कसरत करावी लागत आहे. त्यातून लहान- मोठे अपघात घडतात. हा रस्ता रुंदीकरणासाठी प्रस्तावित आहे पण काहीही काम झाले नसल्याचे नागरिकांचे म्हणणे आहे. तसेच वाढती लोकवस्ती व उद्योग व्यवसाय यांचे वेगाने वाढणारे प्रमाण लक्षात घेऊन या रस्त्याचे रुंदीकरणासह डांबरीकरण करावे अशी येथील नागरिकांची मागणी आहे.
सध्या धुळीचा अनेकांना मोठा त्रास होत असल्याने श्वसनाचे विकार काहींना जडल्याचे स्थानिक नागरिकांनी सांगितले. काही ठिकाणी चेंबर फुटले आहेत. त्यामुळे रस्त्यावर पाणी आले आहे.

‘‘धुळीचा नागरिकांना प्रचंड त्रास होत आहे. अनेक जण आजारी पडले आहेत. रस्त्यावर पाणी मारत नाही. वाहनांच्या वर्दळीतून पादचाऱ्यांना जीव मुठीत घेऊन प्रवास करावा लागतो. डांबरीकरण व रुंदीकरण त्वरित करावे.’’
-मयूर भालेकर, स्थानिक नागरिक