नाल्यांचा नैसर्गिक प्रवाह बदलणाऱ्यांना नोटीस

पिंपरी, ता. २९ : पुणे महानगर प्रदेश विकास प्राधिकरणाने (पीएमआरडीए) नाल्यांवर अतिक्रमण करणाऱ्यांवर कारवाईची मोहीम उघडली आहे. आयटी पार्क, हिंजवडी येथील वेगवेगळया ठिकाणी ओढे-नाल्यांचा नैसर्गिक प्रवाह रोखल्याचे निदर्शनास आले. त्यानुसार वेगवेगळी १५ ठिकाणे निश्चित करण्यात आली होती. त्या सर्व ठिकाणी पाहणी करुन प्रवाह तत्काळ खुला करण्याच्या सूचना करण्यात आल्या. त्यानंतर आता संबंधितांना नोटीस बजाविण्यात आली आहे.

हिंजवडी परिसरात पावसाचे पाणी साचत असल्याने त्याचा निचरा, खड्डे आणि मेट्रोच्या कामांमुळे रस्ते वाहतुकीला येणारे अडथळे प्रमुख कारण असल्याचे दिसून आले होते. त्यानुसार ‘पीएमआरडीए’ अतिरिक्त आयुक्तांनी ‘एमआयडीसी’सह सर्व विभागांची संयुक्त पाहणी केली होती. तसेच, संबंधितांना सूचना केल्या होत्या. त्यावेळी काही त्रुटी आढळून आल्या होत्या. त्या तातडीने दुरुस्त करण्याबाबत कळवले होते.
गेल्या आठवड्यात ‘पीएमआरडीए’च्या पथकाने पाहणी केल्यानंतर वेगवेगळ्या १५ ठिकाणी ओढे, नाल्याचा नैसर्गिक प्रवाह तेथील कंपन्या, बांधकाम व्यावसायिक, नागरिकांनी परस्पर वळवला अथवा रोखल्याचे निदर्शनास आले. त्यातील १३ ठिकाणी ही प्राधिकरणातंर्गत तर, दोन ठिकाणे ‘एमआयडीसी’अंतर्गत होते. त्यानुसार संबंधितांना तो खुला करण्याबाबत कळवले होते. मात्र, त्यापैकी काहींनी त्यावर कार्यवाही केली नसल्याने अखेर त्यांच्यावर बजाविण्यात येणार असून, ३० जूननंतर नियमानुसार कार्यवाही केली जाणार आहे, अशी माहिती मुख्य अभियंता रिनाज पठाण यांनी दिली.

रस्त्यांची दुरवस्था कायम
हिंजवडी फेज-एक ते तीन या टप्प्यांत रस्त्याची कमालीची दुरवस्था झाली आहे. अद्यापही अनेक रस्त्यावर खड्डे कायम आहेत. पावसाने उघडीप दिल्यानंतर रस्ते बुजविण्याचे काम हाती घेतले जाणार आहे. तरीदेखील हिंजवडी ते मारुंजी, हिंजवडी ते लक्ष्मी चौक, हिंजवडी ते छत्रपती चौक या प्रमुख रस्त्यांवर खड्डे कायम आहेत.