पवना नदी किनारा रस्त्यावर गतिरोधकांअभावी अपघात

जुनी सांगवी, ता. ३० ः पवना नदीच्या किनाऱ्यावरून जाणाऱ्या मुख्य रस्त्यावर दोन रस्ते एकत्र येत असल्याने सतत अपघाताच्या घटना घडत आहेत. त्यामुळे सुरक्षेच्या दृष्टिकोनातून तेथे तत्काळ गतिरोधक बसविण्यात यावेत, अशी मागणी नागरिकांमधून होत आहे.
या रस्त्यावर वाहतूक मोठ्या प्रमाणावर आहे. अनेकवेळा दुचाकीस्वार व वाहनधारकांना वेगाने जात आल्यामुळे थेट समोरून येणाऱ्या वाहनांशी धडक होते. विशेषतः रात्रीच्यावेळी इथे अपघातांचे प्रमाण वाढले आहे. विरूद्ध दिशेने वेगात येणाऱ्या वाहनांच्या अपघातांच्या घटनांत वाढ झाली आहे. या परिसरात तीन मंदिरे, उद्यान, नदीघाट, रहिवासी कॉलनी असून रहिवाशांबरोबरच व्यायामासाठी येणारे नागरिक या मार्गे सतत प्रवास करतात. त्यामुळे हा परिसर नेहमी गजबजलेला असतो.
सामाजिक कार्यकर्त्या उज्वला ढोरे म्हणाल्या,‘‘नवी सांगवी, पिंपळे गुरव या भागांत शाळेसाठी ये - जा करण्यासाठी मोठ्या प्रमाणावर वर्दळ असते. पावसाळ्याचे दिवस असल्याने अनेकदा विरूद्ध दिशेने वेगात येणारे दुचाकीस्वार गती कमी करत नाहीत. त्यामुळे वाहन घासणे, अपघात होणे, वादावादीचे प्रकार रोज घडत आहेत.’’
स्थापत्य विभागाचे अभियंता प्रशांत कोटकर म्हणाले,‘‘परिवहन विभागाच्या मार्गदर्शक सूचनांनुसार येथे गतिरोधक बसविण्यात येईल.’’