वारकरी वेशात विद्यार्थ्यांकडून ग्रंथ, पर्यावरण दिंडी

जुनी सांगवी, ता. ३० : जुनी सांगवी परिसरात भक्तिमय वातावरणात ग्रंथ व पर्यावरण दिंडी काढण्यात आला. नृसिंह हायस्कूल व कनिष्ठ महाविद्यालयाच्या वतीने सोहळ्याचे आयोजन करण्यात आले. टाळ मृदंगाच्या गजरात व वारकरी वेशात विद्यार्थी दिंडीमध्ये सहभागी झाले होते. यावेळी विद्यालयातील विद्यार्थिनींनी ढोल ताशाच्या तालावर लेझीमचे प्रात्यक्षिक सादर केले. विद्यार्थ्यांनी दिंडीतून संतांच्या नावाचा गजर केला; तसेच पर्यावरण वाचवा, परिसर स्वच्छ ठेवा, प्रदूषण टाळा व आनंदी जीवन जगा असा संदेश देण्यात आला. दरम्यान, माजी महापौर उषा ढोरे यांनी संत गजानन महाराज मंदिरासमोर दिंडीचे स्वागत केले. कुमार ढोरे, विजय जगताप, सूर्यकांत गोफणे, शरद ढोरे, प्रदीप पाटील, नितीन कदम, क्षितिज कदम, प्राचार्य अशोक संकपाळ आदी या वेळी उपस्थित होते. विद्यालयातील सर्व शिक्षकांनी दिंडीचे संयोजन केले.