‘डीपी’वर हरकती-सूचनांसाठी आज शेवटचा दिवस

पिंपरी, ता. १३ :  पिंपरी-चिंचवड नवनगर विकास प्राधिकरणाकडून (पीसीएनटीडीए) वर्ग केलेल्या क्षेत्रासह महापालिकेने १७३.२४ चौरस किलोमीटर क्षेत्रासाठी प्रारुप विकास आराखडा (डीपी) तयार केला आहे. त्यावर हरकती व सूचना नोंदविण्याचा सोमवार (ता. १४) शेवटचा दिवस आहे. दरम्यान, आतापर्यंत सुमारे ३७ हजार हरकती व सूचना नोंदविण्यात आल्या आहेत.

पिंपरी-चिंचवड महापालिका १९८२ मध्ये अस्तित्वात आली. तेव्हापासून २००८ पर्यंत टप्प्याटप्प्याने गावी समाविष्ट करण्यात आली आहेत. चार वर्षांपूर्वी ‘पीसीएनटीडीए’चे पुणे महानगर प्रदेश विकास प्राधिकरणात (पीएमआरडीए) विलिनीकरण केले आहे. मात्र, ‘पीसीएनटीडीए’चा विकसित भाग महापालिकेकडे वर्ग करण्यात आला आहे. या क्षेत्रासह महापालिका नगररचना विभागाने ‘डीपी’ तयार केला आहे. आयुक्त शेखर सिंह यांनी १४ मे रोजी तो स्वीकारून जाहीर केला होता. त्यावर ६० दिवसांत हरकती व सूचना मागवल्या होत्या. त्यांचा प्रत्येक आठवड्यातील गुरूवारी आढावा घेण्यात आला. दरम्यान, ‘‘मोशीतील कत्तलखाना आरक्षण रद्द करण्यात येईल,’’ असे मुख्यमंत्री देवेंद्र फडणवीस यांनी यापूर्वी स्पष्ट केले आहे.

‘डीपी’वर काही आक्षेप
- चुकीच्या पद्धतीने ‘डीपी प्लॅन’
- दाट लोकवस्तीतून रस्ते व रिंगरोड
- गरज नसताना व्यापारी संकुले
- शेती क्षेत्रावर आरक्षणे टाकल्याने भूमिपुत्र नाराज

‘डीपी’त उल्लेखनीय...
- शहरातील विविध प्रकल्पांसाठी आरक्षणे
- सार्वजनिक सेवा व सुविधा प्रस्तावित
- पोलिस ठाणे आरक्षण
- बस टर्मिनलचे आरक्षण