घरोघरी साफसफाई, रंगरंगोटीची कामे सुरू

जुनी सांगवी, ता.२८ ः गौरी-गणपती उत्सवाची चाहूल लागताच जुनी सांगवीत घरोघरी साफसफाई, रंगरंगोटी आणि घर सजावटीची कामे वेगाने सुरू झाली आहेत. त्यामुळे किरकोळ घर दुरुस्ती आणि रंगकामासाठी बांधकाम कारागीर व रंगारी यांची मागणी मोठ्या प्रमाणावर वाढली आहे.
जुनी सांगवी येथील जुन्या वस्त्या, मध्यमवर्गीय आणि सोसायट्यांमधून गौरी-गणपतीच्या स्वागताची तयारी अधिक जोमात सुरू आहे. कामगार नाका कारागिरांच्या गर्दीने फुलून गेला आहे. कारागीर मिळविण्यासाठी नागरिकांची कामगार नाक्यावर गर्दी वाढू लागली आहे. गौरी-गणपती उत्सव जवळ आल्याने नागरिकांची कारागीर मिळविण्यासाठी धावपळ सुरू असल्याचे चित्र नाक्यावर दिसत आहे. गणपती बाप्पाच्या आगमनापूर्वी घरातील भिंती रंगवणे, ओल्या भिंतींचे प्लास्टर करणे, गळकी नळवाहिनी दुरुस्त करणे, खिडक्या-दारे रंगवणे अशा कामांना प्राधान्य दिले जात आहे. त्यामुळे कारागीर, प्लंबर, रंगारी, इलेक्ट्रिशियन यांची मागणी वाढली असून स्थानिक कामगारांना कामाची संधी मिळत आहे. सिमेंट, रंग, ब्रश, रोलर, हार्डवेअर वस्तू यांची खरेदी वाढली आहे. बहुतांश ग्राहक हे घरगुती पातळीवरच छोट्या प्रमाणावर काम करत आहेत, असे काही बांधकाम साहित्य विक्रेत्यांनी सांगितले.

रसायनविरहित रंगांना पसंती
शहराबाहेरील कारागीर, रंगारी कामगार अड्ड्यावर काम मागण्यासाठी उभे असतात. सध्या फरश्या बसविण्यासाठी
राजस्थानी मिस्त्रींना मागणी आहे. रंगरंगोटीसाठी रसायनविरहीत रंगांना अधिक पसंती दिली जात आहे.
रंगारी साधारणतः ८०० रुपये, गवंडी १२०० रुपये तर मजूर ५००/६०० रुपये मजुरी घेत आहे.

गणपतीच्या स्वागतासाठी घर चकचकीत असावे म्हणून नागरिक रंगरंगोटी व दुरुस्तीला प्राधान्य देतात. त्याचबरोबर किरकोळ दुरुस्ती कामे करण्यात येतात. गणपती ते दिवाळी हा कारागिरांसाठी एक प्रकारे चांगला हंगाम असतो.
- कबीर येळसंगी, बांधकाम ठेकेदार

गौरी-गणपती उत्सवामुळे स्थानिक मजुरांना व कारागिरांना रोजगाराची संधी मिळत असते. त्यांच्यासाठीही हे दिवस कमाईचे पर्व ठरत आहेत. त्यामुळे हार्डवेअर आणि इतर बांधकाम साहित्य, रंगाची विक्री मोठ्या प्रमाणावर होते.
- सतीश जैन, हार्डवेअर दुकानदार

PIM25B20158