केवळ बेशिस्त वाहतूक अन् दुतर्फा पार्किंग

जुनी सांगवी, ता.२ ः जुनी सांगवीतील संविधान चौक मोठा असूनही अवजड वाहने, विरूद्ध दिशेने होणारी बेशिस्त वाहतूक आणि दुतर्फा पार्किंगमुळे रहदारीला अडथळे निर्माण होत आहेत. चौकातील वाहतूक कोंडी आणि अपघातांचे प्रमाण दिवसेंदिवस वाढत आहे. त्यामुळे नागरिक त्रस्त झाले आहेत.
जुनी सांगवी, नवी सांगवी, पिंपळे गुरवकडे ये - जा करण्यासाठी हा मुख्य चौक असल्याने येथे मोठी वर्दळ असते. जुनी सांगवी परिसरातील विद्यार्थी नवी सांगवी, पिंपळे गुरव येथे मोठ्या प्रमाणावर शाळेला जातात. सकाळी व शाळा भरण्याच्या व सुटण्याच्यावेळेला रस्त्यावर मोठी वर्दळ असते. महापालिका आणि वाहतूक विभाग यांनी संयुक्तपणे उपाययोजना करून वाहतुकीचा प्रश्‍न सोडवावा; अन्यथा भविष्यात एखादा मोठा अपघात होण्याची शक्यता नाकारता येत नाही, असे नागरिकांचे म्हणणे आहे.

प्रमुख कारणे
- मोठ्या प्रमाणावर अवजड वाहने व मालवाहू ट्रक तास न तास उभे
- रस्त्याची रुंदी कमी होऊन वाहतूक कोंडी
- दैनंदिन प्रवास करणाऱ्या वाहनचालकांना अपघातांचा धोका
- वाहतूक नियंत्रक दिव्यांचा अभाव
- वाहतूक पोलिस अथवा ट्रॅफिक वॉर्डनची गैरहजेरी
- चुकीच्या दिशेने वाहन चालवणे, बेशिस्तपणे पार्किंग करणे

वादावादीचे प्रकार
या परिसरात शाळा, दुकाने आणि रहिवासी वसाहती मोठ्या प्रमाणावर असल्यामुळे लहान मुले, महिला आणि ज्येष्ठ नागरिकांना रस्ता ओलांडणे कठीण झाले आहे. वाहने एकमेकांना घासण्याच्या घटनांमुळे अनेकदा वादावादीचे प्रकार येथे नित्याचेच झाले आहेत.

नागरिकांच्या मागण्या
- चौकात वाहतूक नियंत्रक दिवे बसवावेत
- वाहतूक पोलिस, ट्रॅफिक वॉर्डनची नेमणूक केली जावी
- अवजड वाहनांचे पार्किंग बंद केले जावे
- सीसीटीव्ही यंत्रणेद्वारे वाहतूक नियंत्रण करावे

या चौकात दोन मोठे वाहतूक बेट करण्यात आलेले आहेत. चौक मोठा असूनही केवळ दुतर्फा पार्किंग, वाहतुकीचे नियम पाळले जात नसल्याने कोंडीसह अपघाताचा धोका वाढला आहे.
- ओंकार भागवत, नागरिक

परिसरात नियमित कारवाई केली जाते. वाहन चालकांनी वाहतुकीचे नियम पाळावेत. येथील कारवाई तीव्र केली जाईल. दोषी वाहनचालाकांवर दंडात्मक कारवाई करण्यात येईल.
- प्रदीप पाटील, वरिष्ठ पोलिस निरीक्षक, वाहतूक विभाग सांगवी