गायक मोहम्मद रफी यांच्या स्मृतिदिनानिमित्त संगीत मैफिल

जुनी सांगवी, ता.२ ः हिंदी सिनेसृष्टीतील अजरामर गायक मोहम्मद रफी यांच्या स्मृतिदिनानिमित्त अखिल सांगवी ज्येष्ठ नागरिक संघाच्यावतीने संगीत मैफिलीचे आयोजन करण्यात आले. रफी यांच्या अजरामर गीतांनी वातावरण भारावून गेले. ज्येष्ठ नागरिकांनी त्यांच्या गाण्यांच्या सुरेल आठवणींना उजाळा दिला.
सांगवीतील संगीत प्रेमी सदस्यांनी रफी यांच्या लोकप्रिय गीतांची सादरीकरणे करून त्यांना आदरांजली अर्पण केली. ‘चाहूंगा मैं तुझे सांज सवेरे’, ‘तेरी आंख्या के सिवा’, ‘क्या हुआ तेरा वादा’, ‘ये रेशमी जुल्फें’, ‘गुलाबी आंखे जो तेरी देखी’, ‘कोई मुझे जंगली कहे’, यासारखी दर्जेदार गीते सादर करत उपस्थितांची मने जिंकली. कार्यक्रमाला मोठ्या संख्येने ज्येष्ठ नागरिक, संगीतप्रेमी आणि स्थानिक नागरिक उपस्थित होते. उपस्थितांनी टाळ्यांच्या गजरात गायनाचा आनंद लुटला.
या कार्यक्रमाचे उद्‍घाटन प्रशांत शितोळे, शिव जिजाऊ प्रतिष्ठानच्या अध्यक्षा शीतल शितोळे, बबन शितोळे, पंकज कांबळे यांच्या हस्ते करण्यात आले. अखिल सांगवी म्युझिकल ग्रुपचे सदस्य श्रीकांत बाबर, ज्ञानेश्वर फाकटकर, संजय जोशी, लक्ष्मण मांजरे, सुरेश सोनवणे, नितीन कदम यांनी गायनात भाग घेतला. उपाध्यक्ष विठ्ठल नंदनवार, संघाचे अध्यक्ष रवींद्र निंबाळकर यांनी संयोजन केले. ध्वनी व्यवस्था दीपक गायकवाड आणि भानुदास भोरे यांनी आभार मानले.