एमएनजीएलची वाहिनी फुटल्याने वाळू गळती

पिंपरी, ता. ८ : पुनावळेमध्ये रस्त्याचे काम सुरू असताना सकाळी आठच्या सुमारास एमएनजीएलची वाहिनी फुटून मोठ्या प्रमाणात गॅस गळती झाली. भुयारी मार्गाजवळ हे घडल्याने त्याजवळील एक मार्ग वाहतुकीसाठी बंद करण्यात आला. परिणामी सकाळी कामानिमित्त बाहेर पडलेल्या नागरिकांना प्रचंड वाहतूक कोंडीला सामोरे जावे लागले.
महापालिकेने तीन डीपी रस्त्यांचे काम हाती घेण्यात आलेले आहे. त्यात पुनावळे गावठाण ते गायकवाड नगर या रस्त्याचे रुंदीकरण होत आहे. रस्त्या विकसित करण्यापूर्वी महाराष्ट्र नॅचरल गॅस लिमिटेडकडून (एनएनजीएल) भूमिगत वाहिनी टाकण्याचे काम सुरू होते. त्यासाठी खोदकाम सुरू असताना एमएनजीएलची वाहिनी फुटली. त्यामुळे या रस्त्याने कार्यालय, शाळेत जाणाऱ्या विद्यार्थी व नागरिकांना मनस्ताप झाला. या गळतीला घटनेला संबंधित ठेकेदाराचा निष्काळजीपणा कारणीभूत असल्याचा आरोप नागरिकांनी केला.
वाहिनी फुटल्यानंतर दुरुस्तीचे काम तातडीने हाती घेण्यात आलेले आहे. या कामामुळे पुनावळे, ताथवडे, मारुंजी परिसरातील गॅस पुरवठा बंद ठेवण्यात आला आहे. सकाळी साडे आठ वाजल्यापासून बंद करण्यात आलेला पुरवठा दहा वाजले तरी सुरू झाला नव्हता. सकाळच्या सुमारासच पुरवठा बंद झाल्याने गृहिणींची गैरसोय झाली. दुपारी एक वाजेपर्यंत पुरवठा सुरळीत होईल, असे सांगण्यात आले.
---
ठेकेदाराच्या चुकीमुळे हजारो नागरिक अडचणीत आले आहेत. हा निष्काळजीपणाचाच परिणाम आहे. रस्त्याच्या कामादरम्यान कधी वीज वाहिनी, कधी जलवाहिनी, तर कधी वायूवाहिनी फुटण्याचे प्रकार वारंवार घडत आहेत. ही कामे करताना सामान्य नागरिकांच्या सुरक्षेचा कोणताही विचार केला जात नाही हेच पुन्हा दिसून आले. संबंधित अधिकाऱ्यांनी तातडीने लक्ष देऊन दोषींवर कडक कारवाई केली पाहिजे.
- सुमीत ढगे, पुनावळे
---
रस्त्याच्या कामासाठी पुनावळे भुयारी मार्गजवळील चौकात खोदकाम सुरू आहे. सकाळी वायूवाहिनी फुटल्यामुळे मोठ्या प्रमाणात वाहतूक कोंडी झाली. सध्या वाहतुकीसाठी एक मार्गिका बंद करण्यात आली आहे. तेथे अतिरिक्त बंदोबस्त लावण्यात आला आहे.
- सुनील पिंजण, पोलिस निरीक्षक, वाकड
----