‘स्वस्थ नारी, सशक्त परिवार’ अभियानाचे उद्‍घाटन

पिंपरी, ता १७ : केंद्र सरकारच्या आरोग्य व कुटुंब कल्याण मंत्रालयामार्फत आयोजित ‘स्वस्थ नारी, सशक्त परिवार’ या विशेष अभियानाचे बुधवारी (ता. १७) महापालिकेच्या चार रुग्णालयांमध्ये उद्‍घाटन करण्यात आले. या अभियाना अंतर्गत महापालिकेची आठ रुग्णालये व २७ दवाखान्यांमध्ये खास महिलांसाठी विशेष आरोग्य शिबिरे भरविण्यात येत आहे. हे अभियान २ ऑक्टोबरपर्यंत चालणार आहे.
तालेरा रुग्णालयात विधान परिषदेच्या सदस्या उमा खापरे, आमदार शंकर जगताप, कै. यशवंतराव चव्हाण स्मृती रुग्णालय येथे आमदार अमित गोरखे; तर कै. आकुर्डीतील ह.भ.प. मल्हारराव कुटे स्मृती रुग्णालय येथे विधानसभा उपाध्यक्ष अण्णा बनसोडे, माजी राज्यसभा सदस्य अमर साबळे यांच्या उपस्थितीत अभियानाला सुरुवात झाली. तर नवीन भोसरी रुग्णालयात टेल्को युनियन अध्यक्ष सचिन लांडगे, महापालिका आयुक्त शेखर सिंह, अतिरिक्त आयुक्त विजयकुमार खोराटे, आरोग्य वैद्यकीय अधिकारी डॉ. लक्ष्मण गोफणे, अधिष्ठाता डॉ. राजेंद्र वाबळे, आरोग्य वैद्यकीय अधिकारी डॉ. अभयचंद्र दादेवार, सहायक आरोग्य वैद्यकीय अधिकारी डॉ. अंजली ढोणे आदी उपस्थित होते.

पिंपरी चिंचवड महापालिका नागरिकांच्या आरोग्य सेवेसाठी नेहमीच तत्पर आहे. महिलांसाठी राबविण्यात येत असलेला हा उपक्रम केवळ आरोग्य सुधारण्यापुरता मर्यादित नसून त्यांच्या सक्षमीकरणासाठी देखील महत्वपूर्ण ठरेल.
- शेखर सिंह, आयुक्त, पिंपरी चिंचवड महापालिका

कोणत्या तपासण्या होणार ?
- उच्च रक्तदाब, मधुमेह, कर्करोग, क्षयरोग, ॲनिमिया तपासणी
- गर्भवती महिलांची तपासणी, हिमोग्लोबिन तपासणी, पोषण समुपदेशन, लसीकरण
- किशोरींसाठी मासिक पाळी व पोषणावरील सत्रे, समुपदेशन
- आयुष्मान भारत डिजिटल मिशन, प्रधानमंत्री जन आरोग्य योजना व आयुष्मान वय वंदना कार्ड वितरण
- निक्षय मित्र स्वयंसेवकांची नोंदणी, क्षयरुग्णांना पोषण आहारासाठी दत्तक घेण्यास प्रोत्साहन
- गरजू रुग्णांसाठी विशेषज्ञांकडून रक्त, लघवी, एक्स रे या सुविधा