जुळी बाळे बघण्याआधीच मावशीचा करून अंत

सकाळ वृत्तसेवा
पिंपरी, ता. ९ : बहिणीला जुळी बाळे होणार असल्याने सुधा आनंदात होती. ताईवर कामाचा भार पडू नये म्हणून ती घरकामात जमेल तेवढी मदत करायची. मावशी बनण्याचा आनंद होण्यापूर्वीच तिचा करुण अंत झाला. राधा ही खासगी कंपनीत नोकरी करते. तिच्या नोकरीच्या ठिकाणीही सुधा जायची.
राम आणि राधा यांचा विवाह सुमारे नऊ वर्षांपूर्वी झाला होता. ते गेल्या आठ वर्षांपासून ज्योतिबानगरमध्ये राहात आहेत. बरीच वर्षे मूलबाळ न झाल्याने ते गेली काही वर्षे वैद्यकीय उपचार घेत होते. नशिबाने त्यांना साथ दिली आणि राधा काही महिन्यांपूर्वी गरोदर राहिली. त्यामुळे हे कुटुंब आनंदात होते. काही दिवसांपूर्वीच सोनोग्राफी झाली तेव्हा जुळी बाळे होणार असल्याचे कळले. डॉक्टरांनी हे सांगितल्यानंतर त्यांच्या आनंदाला पारावर उरला नव्हता.
राम हे मित्र परिवार आणि आजूबाजूच्यांना सांगायचे की, इतकी वर्ष बाळे झाली नाहीत, पण आता देवाने आम्हाला एक नव्हे तर दोन बाळे दिली आहेत. ते नियमित वैद्यकीय तपासणीसाठी दर गुरुवारी भोसरीतील रुग्णालयात जायचे. बाळंतपणानंतर घरकामात मदत व्हावी म्हणून राम यांनी सुधाला उत्तर प्रदेशातील मुळ गावावरून नुकतेच आणले होते.

चौकलेट घेतल्यानंतर दुर्घटना
राम हे दुर्घटनास्थळापासून जवळच असलेल्या वर्कशॉपमध्ये काम करतात. ते सोमवारी (ता. ८) रात्रपाळी करून घरी येऊन झोपले होते. पत्नी दुपारच्या जेवणासाठी घरी आली होती आणि सुधाला घेऊन कामावर पायी जात होती. वाटेत तिने एका दुकानातून सुधासाठी एका चॉकलेट खरेदी केले. त्यानंतर काही अंतरावर रस्ता ओलांडत त्यांना बसची धडक बसली.
-------