बिश्नोई टोळीच्या नावे खंडणीसाठी फोन

पिंपरी, ता. २६ : ‘‘पाच कोटी रुपये द्या, अन्यथा कुटुंबासह सर्वांना संपवेन’’ अशी धमकी वाकड येथील एका महिलेला देण्यात आली. परदेशातून हा फोन कॉल करणाऱ्या व्यक्तीने बिश्नोई टोळीतून बोलत असल्याचे सांगितले, असे महिलेने पोलिसांकडे दिलेल्या तक्रारीत म्हटले आहे. त्यानुसार अर्जुन बिश्नोई असे नाव सांगणाऱ्याविरुद्ध वाकड पोलिस ठाण्यात गुन्हा दाखल करण्यात आला आहे. ‘‘सदर महिला वाकडमध्ये, तर तिचा पती कामानिमित्त दुबईत वास्तव्यास आहे. या प्रकरणात गुन्हा दाखल करून तांत्रिकदृष्ट्या तपास सुरू करण्यात आला आहे,’’ असे वरिष्ठ पोलिस निरीक्षक अशोक कडलग यांनी सांगितले.