ममता अंध शाळेमध्ये रक्षाबंधनाचे हृदयस्पर्शी दर्शन

पिंपळे गुरव, ता. ९ ः रक्षाबंधन हा सण बहीण-भावाच्या प्रेमाचे प्रतीक मानला जातो. याच सणाचे एक आगळेवेगळे, हृदयस्पर्शी दर्शन पिंपळे गुरव येथील ममता अंध अनाथ कल्याण मंडळात अनुभवायला मिळाले. काही महिलांनी दृष्टिहीन आणि अनाथ बांधवांना राखी बांधून आपुलकीचा स्पर्श दिला.
सामाजिक कार्यकर्त्या पल्लवी जगताप यांनी त्यासाठी पुढाकार घेतला. याप्रसंगी ममता अंध व अनाथ आश्रमाचे तुषार कांबळे, शीतल आगरखेड, मीना दळवी, पूनम इनामदार आदी उपस्थित होते
यावेळी बोलताना जगताप म्हणाल्या, ‘‘आज मी केवळ राखी बांधली नाही; तर माझ्या अंध व अनाथ भावांना एक हक्काची बहीण म्हणून ममतेने सामावून घेतले. त्यांच्या चेहऱ्यावरील हास्य आणि डोळ्यांमधील भावना. हाच माझ्यासाठी खरा रक्षाबंधनाचा उत्सव आहे.’’
विद्यार्थ्यांनी देखील ताई, तू बहीण म्हणून आमच्यासाठी आलीस. आता आम्ही कधीच एकटे नाही, अशा शब्दांत आपले प्रेम व्यक्त केले. उपस्थित शिक्षक व संस्थेच्या पदाधिकाऱ्यांनी या उपक्रमाचे विशेष कौतुक केले.

PMG25B02675