पीएमआरडीएत बैठकांचे सत्र सुरू

पिंपरी, ता. २ : पुणे महानगर प्रदेश विकास प्राधिकरणाच्या (पीएमआरडीए) आयुक्तपदी नुकतीच आयुक्त योगेश म्हसे यांची नियुक्ती करण्यात आली. प्रशासनाचा कारभार हाती घेताच नवीन आयुक्तांनी विविध विभागांच्या बैठकांचे नियोजन सुरू केले आहे. सलग तीन दिवस या बैठकांद्वारे प्रशासनाच्या कामकाजाचा आढावा घेतला जाणार आहे. सध्या सुरू असलेले प्रकल्प आणि रखडलेले प्रकल्प यांचीही माहिती घेतली जाणार आहे.
पीएमआरडीएच्या आयुक्तपदाचा कार्यभार म्हसे यांनी नुकताच हाती घेतला आहे. त्यानंतर, कामकाजाचा आढावा घेऊन विविध प्रकल्पांना गती देण्याचा निर्णय त्यांनी घेतला आहे. त्यानुसार, प्रशासन, लेखा, जमीन व मालमत्ता आदी विभागांच्या बैठका ते घेणार आहेत. तर बुधवार आणि गुरुवारी अतिक्रमण, माहिती तंत्रज्ञान, बांधकाम परवानगी, आकाशचिन्ह विभाग आदींच्या बैठका होणार आहेत. सध्या सुरू असलेली कामे, प्रस्तावित कामे, कोणत्या कामांना गती देता येईल, याचा आढावा त्यानिमित्त घेण्यात येणार आहे.