‘मेंटॉर टीचर’साठी नोंदणीचा आज शेवटचा दिवस

पिंपरी, ता. २८ ः शैक्षणिक गुणवत्तेत वाढ होण्यासाठी महापालिकेच्या शिक्षण विभागाने ‘मेंटॅार टीचर’ (कोअर टीम) उपक्रम सुरू केला आहे. त्यात, इच्छुक शिक्षकांनी गुरुवारपर्यंत (ता.२९) नावनोंदणी करावी, असे आवाहन सहायक आयुक्त विजयकुमार थोरात यांनी केले आहे.
‘मेंटॉर टीचर’ शिक्षकांना प्रशिक्षण देणे, वर्गभेटी करून वर्ग निरीक्षण व चर्चांद्वारे प्रत्यक्ष मदत करणे, गुणवत्तापूर्ण शिक्षणासाठी विविध शैक्षणिक कार्यक्रम तयार करून त्यांची अंमलबजावणी करणे, महापालिकेच्या विविध शाळांसोबत काम करणे, शिक्षक, मुख्याध्यापक व शिक्षण विभाग यांच्यात शैक्षणिक दुवा साधणे, शिक्षण क्षेत्रातील नवनवीन प्रयोगांमध्ये सहभागी होणे, नवीन गोष्टी शिकणे-शिकविणे, वर्ग भेटीद्वारे व प्रशिक्षणाद्वारे शिक्षकांना मदत करणे, विविध नावीन्यपूर्ण शाळांना भेटी देऊन नवोपक्रमांचे अनुभव उपयोगात आणणे, अशी कामे ‘मेंटॉर टीचर’ला करावी लागणार आहेत.

‘मेंटॅार टीचर’साठी पात्रता
‘मेंटॉर टीचर’ या उपक्रमामध्ये महापालिकेच्या शाळांमध्ये पूर्णवेळ, नियमित नियुक्त असणारे व किमान सात वर्षे सेवा पूर्ण केलेले शिक्षक अर्ज करू शकतील. इच्छुक शिक्षकांनी https://forms.gle/fcMwrmR3sc4CjYCE6 या लिंकद्वारे गुरुवारपर्यंत (ता.२९) नावनोंदणी आणि अर्ज करावेत. शंका व अडचण असल्यास संपर्क ः पर्यवेक्षिका सुनंदा मगर ः ८०५५६२६५६९

‘मेंटॉर टीचर’ म्हणून निवड झालेल्या शिक्षकांना नवनवीन गोष्टी शिकायला मिळतील. नावीन्यपूर्ण उपक्रम पाहण्यासाठी शैक्षणिक अभ्यास दौरे अनुभवायला मिळतील. महापालिका शाळांतील पूर्ण वर्षाचे शैक्षणिक नियोजन तयार करण्यात व अंमलबजावणी करण्यामध्ये सहभाग नोंदविता येईल. निपुण भारत अभियान अंमलबजावणी, शिक्षक प्रशिक्षण, वर्ग निरीक्षण करून शिक्षकांना मदत करण्याची संधी व सोबतच शिक्षण विभागासोबत काम करण्याची संधी मिळेल.
- शेखर सिंह, आयुक्त, महापालिका

‘मेंटॉर टीचर’ उपक्रमातील शिक्षकांना आपल्या वर्गाची जबाबदारी नसून पूर्णवेळ आपल्या शाळेसोबत इतर शाळेतील शिक्षकांना मदत करण्याचे काम असेल. निवड प्रक्रियेद्वारे ‘मेंटॉर टीचर’ निवडले जातील. प्रथम इच्छुक शिक्षकांकडून अर्ज मागविण्यात येत आहेत. त्यानंतर, अर्जांची छाननी करून लेखी चाचणी व वैयक्तिक मुलाखतीद्वारे निवड जाहीर केली जाईल.
- प्रदीप जांभळे-पाटील, अतिरिक्त आयुक्त, महापालिका