पिंपळे सौदागरमध्ये वृक्षतोडप्रकरणी कारवाईकडे दुर्लक्ष

पिंपरी, ता. २ : पिंपळे सौदागर येथील लक्षद्वीप सोसायटीमध्ये वृक्षतोड होऊनही महापालिकेने कारवाईकडे दुर्लक्ष केले आहे. नोटिस देऊन सहा महिने झाले. पुढील कारवाई अद्याप झाली नसल्‍याची तक्रार स्‍थानिक रहिवासी यश चौधरी यांनी केली आहे. तर वृक्षतोडीचा अहवाल तयार करण्यात आला असून कारवाई करण्यात येईल, अशी माहिती उद्यान विभागाच्‍या वतीने देण्यात आली.
पिंपळे सौदागर येथील लक्षद्वीप सोसायटीमध्ये जांभळाचे वृक्ष उद्यान विभागाची परवानगी न घेता तोडण्यात आल्‍याची तक्रार यश चौधरी यांनी दिली होती. त्‍यानुसार, पिंपरी-चिंचवड महापालिकेच्‍या उद्यान विभागाच्‍यावतीने पंचनामा करण्यात आला. वृक्षतोड झाल्‍याचे आढळून आले. त्‍यानंतर, सोसायटीला नोटिस बजावून सविस्‍तर लेखी खुलासा मागविण्यात आला आहे. या प्रक्रियेला सहा महिन्‍यांचा कालावधी झाल्‍याचे यश चौधरी यांनी सांगितले. मात्र, अद्याप कोणतीही कारवाई झाली नाही. जांभळाचे झाड पाडल्‍याबाबत सोसायटीतील सर्व सभासदांच्‍या सह्यांसह अधिकाऱ्यांना पत्र दिले आहे. त्‍यामध्ये ते झाड नैसर्गिकरित्‍या पडले असल्‍याचे पत्रात नमूद केले असल्‍याची माहिती सोसायटी सभासदांनी दिली.

सोसायटीमधील वृक्षतोडीची तक्रार प्राप्‍त झाली आहे. त्‍यानुसार, आम्‍ही सोसायटीला नोटिस बजावली आहे. त्‍यांच्‍याकडून समाधानकारक खुलासा न आल्‍यास कारवाई केली जाईल.
- अनिल गायकवाड, उद्यान निरीक्षक, पिंपरी-चिंचवड महापालिका