आलीऽऽ आलीऽऽऽ डोंगरची काळी मैऽऽना.... रानमेवा खरेदीसाठी अबालवृद्धांची गर्दी ः विक्रेत्यांचीही लगबग

पिंपरी, ता. ७ ः ‘डोंगरची काळी मैना’ म्हणून सर्वदूर परिचित असणारी करवंदं सध्या बाजारात दाखल झाली आहेत. ‘करवंदं घ्या, करवंदं’च्या आरोळ्यांनी शहरातील पिंपरी कॅंम्प बाजारपेठ आणि काळेवाडी परिसर घुमून जात आहे. हा रानमेवा खरेदी करण्यासाठी अबालवृद्धांची गर्दी होत आहे. दरम्यान, गेल्या पंधरा दिवसांपासून करवंदं आणि जांभळे विक्रीसाठी घेऊन येणाऱ्या विक्रेत्यांची लगबग
पहायला मिळतेय.
किरकोळ विक्रेत्यांना महिनाभर का होईना, करवंद, जांभळातून आर्थिक मिळकत होत असते. तुटपुंज्या कमाईतूनही काही विक्रेत्यांना मिळणारे समाधान मात्र कायम असते. भुशी डॅम, लोणावळा, सासवड या भागातून जांभूळ आणि करंवदांची आवक होत आहे. शहरात सात ते आठ‎ घाऊक व्यापारी दिवसाला २०० ‎किलोपेक्षा अधिक करवंद‎ मागवतात. पाच ते सहा दिवसांपूर्वी ‎घाऊकचा दर १०० रुपये‎ होता तर किरकोळ ‎बाजारात गेल्या आठवड्यात ३०० ते ४०० रुपये किलो दराने जांभळांची विक्री होत आहे. करंवदांची २५० ते ३०० रुपये किलो विक्री होत आहे, अशी माहिती काळेवाडीतील इरफान शेख यांनी ‎सांगितले. सध्या करवंदाला‎ शहरात चांगली मागणी ‎असल्याचे विक्रेत्याने सांगितले.‎

जांभळाला पर्याय करवंद
आंब्यांचा सीझन संपल्यानंतर‎ जांभळाचे आगमन होते. ते आंब्यांवर उतारा म्हणून मधुमेही रुग्ण खातात;‎ परंतु त्यापेक्षाही गुणकारी करवंद आहे. कारण त्यात आंबट तुरट हे गुणधर्म ‎असल्याने ते मधुमेहींसाठी जांभळा एवढेच फायदेशीर आहे, असे‎ आहारतज्ज्ञ सांगतात. दरम्यान,‎ विटामिन सी, विटामिन ए असे भरपूर प्रकारचे‎ मिनरल्स करवंदातून मिळतात.

करवंद सेवनाने रक्तशुद्धी‎
करवंद हे दुर्मिळ प्रकारातील‎ बेरीवर्गीय फळ आहे. ते उच्च प्रतीचे‎ पित्तशामक आहे. उन्हाळ्यात‎ होणारा अॅसिडीटी, भूक न लागणे,‎ पचन न होणे या समस्यांवर गुणकारी‎ आहे. अॅसिडिटीचे प्रमाण उन्हाळ्यात ‎वाढत असल्याने अल्काइन म्हणून ते‎ काम करते. शरीराचे वाढलेले‎ तापमान कमी करते. पाणी पिऊन ‎कोरडेपणा जाणवतो. या ‎कोरडेपणामुळे एजिंगची समस्या‎ निर्माण होते. त्यावर करवंद मात ‎करतात. रक्तशुद्ध अँटीऑक्सिडंट,‎ ऊर्जा देण्याचे काम ते करतात.‎
- डॉ. सोनल बामणे, आहारतज्ज्ञ

२४५०३‎‎‎