छळाला कंटाळून विवाहितेची सहाव्या मजल्यावरून आत्महत्या

पिंपरी, ता. ३ : लग्नात मानपान केला नाही, या कारणावरून विवाहितेचा पती, सासू व सासऱ्याने छळ केला. त्याला कंटाळून विवाहितेने इमारतीच्या सहाव्या मजल्यावरून उडी घेऊन आत्महत्या केली. ही घटना ताथवडे येथील रामनगर येथे घडली.
याप्रकरणी प्रदीप नारायणराव जामीनदार (रा. तुळशीनगर, इंदोर) यांनी वाकड पोलिस ठाण्यात फिर्यादी दिली आहे. त्यानुसार पती केशरीनंदण तेजनारायणलाल कर्ण (वय ३३), सासू शीला तेजनारायणलाल कर्ण, सासरा तेजनारायणलाल कर्ण (सर्व रा. कोहिनूर सफायर, रामनगर, ताथवडे) यांच्यावर गुन्हा दाखल झाला आहे. फिर्यादी यांच्या तीस वर्षीय मुलीचा आरोपी केशरीनंदन याच्याशी विवाह झाला. यावेळी लग्नात मानपान केला नाही, जास्त वस्तू आणल्या नाहीत, तसेच घरगुती कारणावरून सासरच्यांनी विवाहितेला शारीरिक व मानसिक त्रास दिला. तिला घराबाहेर न निघू देता तिच्यावर पाळत ठेवली. या त्रासाला कंटाळून विवाहितेने इमारतीच्या सहाव्या मजल्यावरील राहत्या घराच्या बाल्कनीतून उडी घेत आत्महत्या केली. वाकड पोलिस अधिक तपास करीत आहेत.