सुदुंबरे ते पिंपरी रस्ता मार्गावरील बसच्या फेऱ्या वाढविण्याची मागणी

पिंपरी, ता. २८ : पुणे महानगर परिवहन महामंडळाच्या (पीएमपी) बसच्या सुदुंबरे ते पिंपरी रस्ता या मार्गावरील फेऱ्या वाढविण्याची मागणी नागरिकांकडून होत आहे.
या मार्गावर बस सुरू झाल्याने प्रवाशांची सोय होत आहे. सुदुंबरे येथून पिंपरीला जाणे शक्य होत आहे. पिंपरीतील मेट्रो स्थानकापासून सुरू होणारी ही बस चिंचवड, निगडी, देहूरोड, चिंचोली, झेंडेमळा, माळीनगर, देहू मार्गे येलवाडी, देहूफाटा, सुदुंबरे पर्यंत जात आहे. त्यामुळे देहूत दर्शनासाठी येणाऱ्या भाविकांसह शाळा, महाविद्यालयात जाणाऱ्या विद्यार्थ्यांनादेखील मेट्रो स्थानकापर्यंत येण्यासाठी सोय होत आहे. मात्र, सध्या या मार्गावरील फेऱ्यांची संख्या कमी आहे. त्यामुळे प्रवाशांना खूप वेळ बसची वाट पाहावी लागत आहे. वेळेत बस न मिळाल्यास इतर वाहनांनी प्रवास करावा लागतो. अथवा निगडीपर्यंत येऊन दुसऱ्या बसने प्रवास करावा लागत आहे.
सध्या अनेकजण पुण्यात जाण्या-येण्यासाठी मेट्रोने प्रवास करण्यालाही प्राधान्य देत आहेत. मेट्रो स्थानकापर्यंत बस सुरू केल्याने ग्रामीण भागातून येणाऱ्या प्रवाशांसाठीही ही बस सोयीची ठरत आहे. त्यामुळे, बसची संख्या वाढवून फेऱ्याही वाढवाव्यात, अशीही मागणी प्रवाशांकडून होत आहे.
---