दारूच्या नशेत दाम्पत्याला मारहाण; सोनसाखळी हिसकावली

पिंपरी : दारूच्या नशेत असलेल्या दोन आरोपींनी एका दाम्पत्याला शिवीगाळ व मारहाण केली. तर, तिसऱ्या आरोपीने महिलेच्या गळ्यातील सोनसाखळी जबरदस्तीने हिसकावली. ही घटना पिंपरीतील गांधीनगर येथे घडली. याप्रकरणी महिलेने संत तुकारामनगर पोलिस ठाण्यात फिर्याद दिली आहे. त्यानुसार पोलिसांनी संदेश उर्फ मोन्या सुनील गायकवाड (वय २२), शुभम उर्फ सोन्या सुनील गायकवाड (वय २३), पवन सचिन ससाणे (वय २०, तिघेही रा. गांधीनगर, पिंपरी) यांना अटक केली आहे. फिर्यादी महिला त्यांच्या पतीसोबत मिठाई विकण्यासाठी जात होत्या. त्यावेळी आरोपी संदेश आणि शुभम दारूच्या नशेत आले. त्यांनी फिर्यादी आणि त्यांच्या पतीला शिवीगाळ करून मारहाण केली. याचवेळी आरोपी पवन याने महिलेच्या गळ्यातील ४० हजार रुपये किमतीची सोनसाखळी जबरदस्तीने हिसकावली आणि तेथून पसार झाले. पोलिसांनी तिन्ही आरोपींना अटक केली आहे.

पूर्व वैमनस्यातून तरुणाला मारहाण; रिक्षाची तोडफोड
पिंपरी : जुन्या वादातून चौघांनी मिळून एका तरुणाला शिवीगाळ करून लाथा-बुक्क्यांनी मारहाण केली. तसेच सिमेंटचा गट्टू डोक्यात मारल्याने तरुण गंभीर जखमी झाला. यासह तरुणाच्या रिक्षाची तोडफोड करून नुकसान केले. ही घटना पिंपरीतील खराळवाडी येथे घडली. याप्रकरणी प्रथमेश सतीश टंकसाळे (रा. बजरंगनगर, खराळवाडी, पिंपरी) यांनी संत तुकारामनगर पोलिस ठाण्यात फिर्याद दिली आहे. त्यानुसार पोलिसांनी रोहित मल्लिकार्जुन होसमनी (वय २०, रा. पिंपळे गुरव), साहिल वंजाळे (वय २४, रा. पिंपरी), अभिषेक प्रधान (वय २०, रा. पिंपरी), ओंकार कदम (वय २५, रा. पिंपरी) यांच्यावर गुन्हा दाखल केला आहे. फिर्यादीच्या भावासोबत झालेल्या वादाच्या रागातून आरोपी रोहित, साहील व अभिषेक यांनी फिर्यादीला शिवीगाळ व मारहाण केली. तर आरोपी ओंकार याने सिमेंटचा गट्टू फिर्यादीच्या डोक्यात मारल्याने त्यांच्या डोक्यात दुखापत झाली. तसेच आरोपींनी रिक्षाची तोडफोड करून नुकसान केले.

भरधाव मोटारीच्या धडकेत दुचाकीस्वार जखमी
पिंपरी : भरधाव मोटारीने एका दुचाकीला धडक दिल्याने दुचाकीवरील तरुण गंभीर जखमी झाला. ही घटना देहूरोड येथे मुंबई-पुणे महामार्गावर घडली. याप्रकरणी प्रजिष वासुदेवन नायर (रा. किवळे) यांनी देहूरोड पोलिस ठाण्यात फिर्याद दिली आहे. त्यानुसार पोलिसांनी मोटार चालकावर गुन्हा दाखल केला आहे. फिर्यादी यांचे मोठे भाऊ प्रजित हे कामासाठी देहूरोडहून पिंपरीकडे दुचाकी वरून जात होते. देहूरोड येथे त्यांच्या पाठीमागून आलेल्या मोटारीने दुचाकीला धडक दिली. या धडकेत प्रजित यांच्या डोक्याला, चेहऱ्याला, पाठीला व हाताला गंभीर दुखापत झाली.
---