गुन्हे वृत्त

तरुणावर हल्ला, टोळक्याची दहशत
पिंपरी : जुन्या वादातून तरुणाावर धारदार कोयत्याने प्राणघातक हल्ला करण्यात आला. तसेच टोळक्याने परिसरात दहशत माजवली. ही घटना थेरगावमधील गुजरनगर परिसरात घडली. रोहन सोपान निमज (वय २०, रा. महादेव कॉलनी, गुजरनगर, थेरगाव), शुभम पवार (वय २०, रा. चिंचवड) व प्रशांत उर्फ बापू सकट (वय २२, रा. महादेव कॉलनी, गुजरनगर, थेरगाव) अशी अटक केलेल्या आरोपींची नावे आहेत. राहुल प्रल्‍हाद कनघरे (वय ३०) असे जखमी तरुणाचे नाव असून याबाबत त्‍याच्‍या आईने वाकड पोलिस ठाण्‍यात फिर्याद दिली आहे. आरोपीसोबत पूर्वी झालेल्या भांडणाचा राग मनात धरून आरोपींनी संगनमताने राहुलवर धारदार कोयत्याने हल्ला केला. त्यामध्ये राहुल याच्या डाव्या हाताचा पंजा, चार बोटांसह तुटून गंभीर दुखापत झाली. त्यानंतर आरोपींनी ‘आम्ही इथले भाई आहोत’, असे म्हणत परिसरात दहशत निर्माण केली.

महिलेची ५९ हजारांची फसवणूक
पिंपरी : एका महिलेची ५९ हजार रुपयांची ऑनलाइन फसवणूक झाली. ही घटना काळेवाडीतील पाचपीर चौक येथे घडली.
याप्रकरणी काळेवाडी येथील एका महिलेने काळेवाडी पोलिस ठाण्‍यात फिर्याद दिली आहे. त्यानुसार अज्ञात आरोपींवर गुन्हा दाखल झाला आहे. फिर्यादी यांनी मिशो या ऑनलाईन अ‍ॅपवर खरेदी केलेल्या बांगड्या परत करण्यासाठी गुगलवर एक क्रमांकाचा शोध घेतला असता त्यावर मिळालेल्या क्रमांकावर फिर्यादी यांनी संपर्क साधला असता फिर्यादी यांना गुगल पे वरून ५९ हजार रुपये पाठवण्यास भाग पाडले.

बांधकामाच्या वादातून एकाला मारहाण
पिंपरी : बांधकामाच्या वादातून शेजाऱ्याने एकाला घरात शिरून लोखंडी गजाने मारहाण केली. ही घटना चिखलीतील ताम्हणे वस्ती येथे घडली. गणेश एकनाथ लोकरे (रा. हनुमाननगर, ताम्हणे वस्ती, चिखली) असे गुन्‍हा दाखल झालेल्‍या आरोपीचे नाव आहे. याप्रकरणी अनिल रंगनाथ सालगुडे (वय ५२, रा. हनुमाननगर, ताम्हणे वस्ती) यांनी चिखली पोलिस ठाण्‍यात फिर्याद दिली आहे. आरोपीच्‍या वडिलांशी झालेल्या वादाचा राग मनात ठेवून आरोपी हा फिर्यादीच्या घरात शिरला. त्यांना शिवीगाळ करत त्यांच्या डोक्यात लोखंडी गज मारून दुखापत केली.

मोटारीची धडक, दुचाकीस्वार गंभीर जखमी
पिंपरी : भरधाव मोटारीने दिलेल्या धडकेत दुचाकीस्वार गंभीर जखमी झाला. ही घटना निगडी येथे घडली.
संजय शामसुंदर मिस्तरी (वय ४८, रा. निगडी) असे गुन्‍हा दाखल झालेल्‍या मोटार चालकाचे नाव आहे. या प्रकरणी साईप्रसाद बालाजी मुंढे (वय २५, रा. विशाल रेसीडेन्सी, कासारवाडी) असे जखमी दुचाकीस्‍वाराचे नाव असून त्‍यांनी निगडी पोलिस ठाण्‍यात फिर्याद दिली आहे. आरोपीने डावीकडे वळताना अचानक फिर्यादीच्या दुचाकीस धडक दिली. त्यात फिर्यादीचा डावा कान, खांदा, पाय व पाठीला गंभीर दुखापत झाली.