पिंपरी मतदारयाद्या घोळ

मतदारयाद्यांमध्ये
चुका कायम

पिंपरी, ता. २१ ः महापालिका निवडणुकीसाठीच्या मतदारयाद्या प्रसिद्ध करण्याची तारीख निवडणूक आयोगाने दोन वेळा बदलली होती. अखेर गुरुवारी (ता. २०) याद्या प्रसिद्ध केल्या. मात्र, त्यातही अनेक चुका कायम असून हरकती व सूचना येत आहेत. अनेक नावे एका प्रभागातून लगतच्या प्रभागात गेली आहेत. नाव व पत्त्यांमध्येही चुका आहेत. प्रभाग १२ तळवडे त्रिवेणीनगरमधील यादी भाग क्रमांक सात संपूर्णतः प्रभाग एक चिखली पाटीलनगर मोरेवस्तीमध्ये समाविष्ट केल्याचा आक्षेप घेण्यात आला आहे. येथील मतदार संख्या एक हजार २६१ आहे. विशेष म्हणजे २०१७ मध्ये प्रभाग १२ मधून निवडून आलेल्या उमेदवाराचे नावही प्रभाग एकमध्ये आले आहे. शिवाय, पहिल्या दिवशी १७ हरकती आल्या आहेत. त्यात ‘फ’ क्षेत्रीय कार्यालयाकडे तीन आणि ‘ह’ क्षेत्रीय कार्यालयाकडे १३ अशा १६ हरकती मतदारांनी तर, ‘क’ क्षेत्रीय कार्यालयाकडे एक हरकत तक्रारदाराने नोंदवली आहे. दरम्यान, तळवडेतील नागरिकांनी शुक्रवारी क्षेत्रीय कार्यालयात जाऊन अधिकाऱ्यांची भेट घेतली. वैयक्तिक हरकत नोंदविण्याबाबत त्यांना सांगितले आहे. तसेच, सायंकाळी नागरिकांची बैठक घेऊन प्रशासनाचा निषेध नोंदवला.
---