पीएमआरडीए कार्यालये आता तालुकास्तरावर

पिंपरी, ता. १५ : पुणे महानगर प्रदेश विकास प्राधिकरणाच्‍या (पीएमआरडीए) अंतर्गत प्रादेशिक आणि तालुकास्‍तरीय कार्यालयासाठी मंजुरी मिळाली आहे. त्यानंतर आता कर्मचाऱ्यांची नियुक्‍ती सुरू आहे. सुमारे ५० कर्मचाऱ्यांवर विविध कार्यालयांची जबाबदारी देण्यात येणार आहे. यामुळे ग्रामीण भागातील नागरिकांचे पुणे, पिंपर चिंचवड येथील कार्यालयातील हेलपाटे थांबणार आहेत.
जिल्ह्यातील दौंड, शिरूर, खेड, पुरंदर, भोर, वेल्हा, मुळशी या तालुक्यांच्या ग्रामीण भागांतील नागरिकांसाठी पीएमआरडीएची कार्यालये गैरसोयीची आहेत. तेथे येण्यासाठी सुमारे अडीच ते तीन तास लागतात. त्यामुळे चार प्रादेशिक आणि नऊ तालुका कार्यालये स्‍थापन करण्यासाठी आयुक्त योगेश म्हसे यांनी शासनाकडे प्रस्ताव पाठविला होता. त्याला मंजुरी देण्यासह मनुष्यबळ वापरण्यास शासनाने परवानगी दिली आहे. त्यासाठी संबंधित तहसील, पंचायत समिती, नगरपालिकेलगत तात्पुरते भाडेतत्वावर किंवा शासकीय जागा शोधण्याच्या सूचनाही देण्यात आल्या आहेत. एका कार्यालयासाठी कमित कमी सात पदे भरली जाणार आहेत. सध्या पाच कर्मचाऱ्यांची नियुक्‍ती करून त्‍यांच्‍यावर जबाबदारी निश्‍चित केली आहे.

क्षेत्रीय किंवा तालुका कार्यालयासाठी पदे : नगर रचना सहाय्यक, उपअभियंता, कनिष्ठ शाखा अभियंता, लिपिक टंकलेखक,
शिपाई.

सध्या जे कर्मचारी आहेत. त्‍यांच्‍यावर कार्यालयाची जबाबदारी देण्यात आली आहे. काही आणखी कर्मचारी नियुक्‍ती करण्यात येतील. त्‍यासाठी कंत्राटी पद्धतीने भरती केली जाईल.
- पूनम मेहता, सह आयुक्त, पीएमआरडीए.